ނުލާއި ހުދުގެ ލަޝްކަރުން ފުރަތަމަ ޑިވިޝަނަށް އެނބުރިއައިސް ފުރަތަމަ ޑިވިޝަނުގައި މިރޭ ކުޅުނު ދެވަނަ މެޗުގައި މިރޭ ޔުނައިޓެޑް ވިކްޓްރީ ބަލިކޮށް ލީގުގެ މޮޅުވުމުގެ ރެކޯޑް ދަމަހަށްޓައިފިއެވެ. މިމުބާރާތުގައި ނިއުރޭޑިއަންޓުން ކުޅުނު ދެވަނަ މެޗުން ޔުނައިޓެޑް ވިކްޓަރީ (ޔޫވީ) އަތުން މޮޅުވީ 2-0 ންނެވެ.

2019 ވަނަ އަހަރުގެ ފަހުން ފުރަތަމަ ޑިވިޝަނަށް އެނބުރި އައިސް ކުޅުނު ފުރަތަމަ މެޗުގައި ޓީސީ ސްޕޯޓްސް ކްލަބް އަތުން 6-0 އިން މޮޅުވި ނިއުއިން، މިރޭ ކުޅުނު މެޗުގައި ދެ ލަނޑުވެސް ޖެހީ ދެވަނަ ހާފުގައެވެ.

Ad by Hajj Corporation

ގަލޮޅު ދަނޑުގައި ކުޅުނު މިރޭގެ މެޗުގައި ނިއުގެ ލީޑުނެގި ލަނޑަކީ ދެވަނަ ހާފުގައި ހިލޭ ޖެހުމަކުން ކެޕްޓަން އަލީ ފާސިރު (ސެންޓޭ) ޖެހި ގޯލެކެވެ. ލީގުގައި ޓީސީއާ އެކު ކުޅުނު މެޗުގައި ވެސް ސެންޓޭ ވަނީ ހިލޭ ޖެހުމުން ގޯލު ޖަހައިފައެވެ. މެޗުގެ އިތުރު ވަގުތުގައި ނިއުގެ ދެވަނަ ލަނޑު ޖެހީ ބްރެޒިލްގެ މިޑްފީލްޑަރު ގޯމޭސް ޑަ ސިލްވާ އެވެ.

މިރޭގެ މެޗަށް ނިއުއާ ހަވާލުވެ ހުރީ އަލީ ސުޒޭން އެވެ. އަދި ޔުނައިޓެޑް ވިކްޓަރީ އަށް އިރުޝާދުދެމުން އައީ ސުޒޭންގެ ކޮއްކޮ މުހައްމަދު ނަޒީހު އެވެ.

ލީގުގައި ފުރަތަމަ ދެ މެޗުން މޮޅުވެ، ހަ ޕޮއިންޓް ހޯދާފައިވަނީ ނިއުގެ އިތުރުން އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އެވެ. ޔުނައިޓެޑް ވިކްޓަރީ ވަނީ ފުރަތަމަ މެޗުގައި އޮޑި ސްޕޯޓްސް ކްލަބް އަތުން ބަލިވެފައެވެ.

މި ނަތީޖާއާއެކު ނިއުގެ ލަޝްކަރު ވަނީ މިފަހަރު މިމުބާރާތައް ނިކުމެތިބީ ސީދާ ތަށްޓަށް އަމާޒުހިފާފައިކަން ސާބިތުކޮށްދީފައެވެ.