ދިރާގު ދިވެހި ޕްރިމިއާ ލީގުގައި މިއަދު ހަވީރު ކްލަބް ވެލެންސިއާ އާއި ވާދަކުރި މެޗު ނިއު ރޭޑިއަންޓުން ކާމިޔާބުކޮށްފިއެވެ. މިމެޗު ނިއުރޭޑިއަންޓުން ކާމިޔާބުކުރީ 2-0 އިންނެވެ. މި މެޗުގެ ދެ ގޯލު ވެސް ކާމިޔާބުކުރީ ނިއު ރޭޑިއަންޓްގެ ކެޕްޓަން އަލީ ފާސިރު (ސެންޓޭ) އެވެ.

ނުވަ އަހަރަށްފަހު ދެ ޓީމު ޕްރިމިއާ ލީގުގައި ބައްދަލުކުރި މި މެޗުގެ ފުރަތަމަ ހާފުގައި ދެ ޓީމަށް ވެސް ގޯލު ކާމިޔާބު ނުކުރެވުނެވެ. ނަމަވެސް ދެވަނަ ހާފުގައި ނިއު ރޭޑިއަންޓްގެ ކެޕްޓަން ސެންޓޭ ވަނީ ދެ ގޯލު ކާމިޔާބުކޮށްފައެވެ. އޭގެ ތެރެއިން ފުރަތަމަ ގޯލު ކާމިޔާބުކުރީ 60 ވަނަ މިނެޓުގައި ބޮލުން ޖެހި ގޯލަކުންނެވެ. ދެވަނަ ގޯލު ކާމިޔާބުކުރީ 82 ވަނަ މިނެޓުގައި ޕެނަލްޓީ ސްޕޮޓުންނެވެ.

Ad by Hajj Corporation

ހަތަރު ސީޒަނަށްފަހު އަލުން ޕްރިމިއާ ލީގުގައި ވާދަކުރަމުންދާ ނިއު ރޭޑިއަންޓް އިން ވަނީ މިހާތަނަށް ކުޅުނު ތިން މެޗުން ވެސް މޮޅުވެފައެވެ. އަދި މި ތިން މެޗުގައި ޖުމްލަ 10 ގޯލު ކާމިޔާބުކޮށްފައިވާއިރު، އެއްވެސް ގޯލެއް ބައިކޮޅަށް ވަދެފައެއް ނުވެއެވެ. މިހާތަނަށް ކޮޅަށް ގޯލެއް ނުވަންނަ ހަމައެކަނި ޓީމަކީ ވެސް ނިއު ރޭޑިއަންޓެވެ.

މި މެޗުގައި ދަނޑުމަތީގައި ހުރި އެންމެ ތަޖުރިބާކާރު ކުޅުންތެރިޔާ ކަމަށްވާ ސެންޓޭ ވަނީ މިހާތަނަށް ކުޅުނު ތިން މެޗުގައި ވެސް ގޯލު ޖަހައިފައެވެ. އޭގެ ތެރެއިން މި މެޗުގައި ޖެހި ދެ ގޯލާއެކު އޭނާ ވަނީ މި ސީޒަންގައި މިހާތަނަށް ފަސް ގޯލު ކާމިޔާބުކޮށްފައެވެ.

އެންމެ ފަހުން ދެ ޓީމު ޕްރިމިއާ ލީގުގައި ބައްދަލުކުރީ 2016 ވަނަ އަހަރުގެ ސެޕްޓެމްބަރު 20 ގައެވެ. އެ މެޗު ވެލެންސިއާ އިން ކާމިޔާބުކުރީ 1-0 އިންނެވެ. އެ މެޗުގެ ހަމައެކަނި ލަނޑު ޖަހައިދިނީ، މިހާރު ގައުމީ ފުޓްސަލް ޓީމުގެ ކޯޗު، އަހުމަދު ނިޔާޒް (ނިޔަޓޭ) އެވެ.