ރިޔާސީ އިންތިހާބުގެ ކެމްޕެއިނަށް ގައުމީ އެއާލައިން މޯލްޑިވިއަންގައި އެމްޑީޕީން ކުރި ދަތުރުތަކަށް ދައްކަންޖެހޭ ފައިސާ ނުދައްކާތީ އެ ޕާޓީގެ އެކައުންޓުތައް ފްރީޒްކޮށްގެން ފައިސާ ހޯދަން މޯލްޑިވިއަން ހިންގާ އައިލެންޑް އޭވިއޭޝަނުން ސިވިލް ކޯޓުގައި އެދިއްޖެ އެވެ.

މި މައްސަލައަކީ 2023 ވަނަ އަހަރުގެ ރިޔާސީ އިންތިހާބުގެ ދުވަސްވަރު އެ ޕާޓީން ކުރި ކެމްޕެއިން ދަތުރުތަކަށް ދައްކަންޖެހޭ 5.6 މިލިއަން ރުފިޔާގެ މައްސަލައެކެވެ.

Ad by Hajj Corporation

އެ މައްސަލައިގައި އެމްޑީޕީން ދައްކަންޖެހޭ 5.6 މިލިއަން ރުފިޔާގެ ތެރެއިން ދެ މިލިއަން ރުފިޔާ މިހާތަނަށް ވަނީ ދައްކާފައެވެ.

ނަމަވެސް ބާކީ 3.6 މިލިއަން ރުފިޔާ ނުދެއްކެނީ އެ ޕާޓީއަށް ދައުލަތުން ދޭންޖެހޭ ފައިސާ ލިބުން ލަސްވުމުގެ ސަބަބުން ކަމަށް އެމްޑީޕީން އަންނަނީ ބުނަމުންނެވެ.

އެ މައްސަލައިގައި އައިލެންޑް އޭވިއޭޝަނުން އެދިފައިވަނީ ފައިސާ ނުދައްކާތީ އެމްޑީޕީގެ އެކައުންޓްތައް ފްރީޒްކުރުމަށެވެ. އަދި ދައުލަތުގެ ބަޖެޓުން އެމްޑީޕީއަށް ދިން ފައިސާގެ ތެރެއިން އެ ފައިސާ އުނިކުރުމަށްފަހު ކޯޓު މެދުވެރިކޮށް ހޯދުމަށް ވަނީ އެދިފައެވެ.

3.6 މިލިއަން ރުފިޔާ ނުދެއްކެނީ އެ ޕާޓީއަށް ދައުލަތުން ދޭންޖެހޭ ފައިސާ ލިބުން ލަސްވުމުގެ ސަބަބުން ކަމަށް އެމްޑީޕީން ބުނާއިރު ސިޔާސީ ޕާޓީތަކަށް ބަޖެޓު ދޫކުރުމަށް ކުރަމުންދާ މަސައްކަތުގެ ދަށުން އެމްޑީޕީއަށް 8.45 މިލިއަން ރުފިޔާ ޖަމާކުރަން އިލެކްޝަންސް ކޮމިޝަން (އީސީ)ން ވަނީ މިދިޔަ މަހުގެ ކުރީކޮޅުގައި ފޮނުވާފައެވެ.

އެމްޑީޕީން މޯލްޑިވިއަން އަށް 3.6 މިލިއަން ރުފިޔާ ނުދައްކާތީ އެކައުންޓްތައް ފްރީޒްކޮށްގެން އެ ފައިސާ ހޯދަން ހުށަހެޅިއިރު އެމްޑީޕީ ސަރުކާރުގެ ބޮޑެތި ވައްކަމާއި ހިޔާނާތުގެ މައްސަލަތަކެއް މިފަހުން ދަނީ ފެނަމަތިވަމުންނެވެ.