ލަންކާ ވިއްސާރަ: ނުވަރަލިއާ އިން ގެއްލުނު ދިވެހި އާއިލާ ފެނިއްޖެ
29 ނޮވެމްބަރު 2025 - 05:33

ލަންކާގެ ނުވަރަލިއާ އިން ގެއްލުނު ދިވެހި ޢާއިލާއަށް ގުޅިއްޖެއެވެ.
ގެއްލިގެން ހޯދީ ނުވަރަލިއާގެ ފަރުބަދަ ސަރަހައްދަކަށް ދިޔަ ދެމަފިރިއަކާއި އެ މީހުންގެ ކުޑަ ދަރިފުޅެވެ. އޭގެ ތެރެއިން ދިވެއްސަކީ ދިވެހި ފިރިހެން މީހާއެވެ. އެ މީހުންގެ ހަބަރެއް ނުވެގެން އެގައުމުގައި ދިރިއުޅެމުންދާ އާއިލާގެ ރަހުމަތްތެރިއެއް ލަންކާ އެމްބަސީއަށް ރިޕޯޓްކުރީ މީގެ ތިން ދުވަސް ކުރިންނެވެ.

Ad by Hajj Corporation
އެނގިފައިވާ ގޮތުގައި، އެ އާއިލާއާ މިހާރު ވަނީ ގުޅިފައެވެ.
ބައެއް ފަހަރު ލަންކާގެ ފަރުބަދަ ސަރަހައްދުތަކުން ކަރަންޓު ކެނޑިގެން ވެސް މީހުންނާ ހަބަރު ނުވެވެއެވެ.
"ދިޓްވާ" ތޫފާން ސްރީލަންކާ އަށް އަރާފައިވާތީ، ބޯކޮށް ވާރޭ ވެހި، ގަދަ ވަޔާއި ކަނޑު ގަދަވެ ނުރައްކާ ވަނީ ވަރަށް ބޮޑުވެފައެވެ. މުޅި ލަންކާ އަށް ރަތް ސަމާލު ނެރެ، ބޯކޮށް ވާރޭ ވެހޭނެކަމުގެ އިންޒާރެއް ވަނީ ނެރެފައެވެ. ލަންކާގައި ބިންގަނޑު ކަނޑައިގެން ދިއުމުގެ ހާދިސާތައް ހިނގަމުން އަންނައިރު، ކޯރުތައް ބަންޑުންވެ، ފެންގަނޑުތައް އަންނަނީ އެކި ހިސާބުތަކަށް ފެތުރެމުންނެވެ.
ލަންކާ ސަރުކާރުން ވަނީ މޫސުން ގޯސްވުމުގެ ސަބަބުން ހާއްސަ ހިދުމަތްތައް ފިޔަވާ ހުރިހާ ސަރުކާރުގެ މުއައްސަސާތަކަށް މިއަދަކީ ބަންދު ދުވަހެއްގެ ގޮތުގައިވެސް ކަނޑައަޅައިފައެވެ.


