ސްރީލަންކާއަށް މިވަގުތު ކުރިމަތިވެފައިވާ ކާރިސީ ޙާލަތުގައި ފްލައިޓްތައް ކެންސަލްވުމާ ގުޅިގެން ނުފުރި ލަސްވާ ފަރާތްތަކުގެ ވިސާއަށް ލުއިތަކެއް ދިނުމަށް ސްރީލަންކާގެ ޑިޕާޓްމަންޓް އޮފް އިމިގްރޭޝަން އެންޑް އެމިގްރޭޝަނުން ނިންމައިފިއެވެ.

އެ ޤައުމުގައި ހުންނަ ދިވެހި އެމްބަސީން ބުނީ، ސްރީލަންކާގައި މިވަގުތު ތިބި އެހެން ޤައުމުތަކުގެ ރައްޔިތުންނަށް މިޙާލަތުގައި ނުފުރި ލަސްވުމާ ގުޅިގެން ވިސާ ހަމަވުމުގެ މައްސަލަތައް ކުރިމަތިވަމުންދާތީ ސްރީލަންކާގެ އިމިގްރޭޝަނުން އެކަމުގައި ލުއިގޮތްތަކެއް ހަމަޖައްސަވައިދެއްވާފައިވާ ކަމަށެވެ. އެގޮތުން މިމަހުގެ 28 ވަނަ ދުވަހު ފުރަން ހަމަޖެހިފައިވާ ފަރާތްތަކުގެ ތެރެއިން މޫސުން ގޯސްވެ، ފްލައިޓްތައް ކެންސަލް ކުރުމާއި ގުޅިގެން ނުފުރި ތިބި ފަރާތްތަކުގެ ވިސާގެ ފީއާއި، ވިސާ ހަމަވެ އިތުރަށް މަޑުކުރަންޖެހޭ މުއްދަތުގައި އަރާ ޖޫރިމަނާ ފީތައް މާފު ކުރުމަށް ސްރީލަންކާގެ އިމިގްރޭޝަނުން ނިންމާފައިވާ ކަމަށް އެމްބަސީން ވިދާޅުވެއެވެ.

ކުރު މުއްދަތަކަށް ދަތުރުކުރާ ފަތުރުވެރިންނާއި، ބިޒްނަސް ވިސާއާއި ރެސިޑެންސް ވިސާ ފުރިހަމަ ކުރުމަށް 7 ދުވަހުގެ މުހުލަތެއް ދިނުމަށްވެސް ސްރީލަންކާގެ އިމިގްރޭޝަނުން ވަނީ ނިންމަވާފައެވެ. އަދި މި ޚިދުމަތްތައް ސްރީލަންކާގެ އިމިގްރޭޝަންގެ ވެބްސައިޓު މެދުވެރިކޮށް ލިބޭނެ އިންތިޒާމް ވަނީ ހަމަޖައްސަވާފައެވެ.

ސްރީލަންކާއަށް މިހާރު ކުރަމުންދާ ވިއްސާރައިގައި އެޤައުމުގައި ވަނީ، ކުއްލި ޙާލަތު ޢިއުލާންކޮށްފައެވެ. އެޤައުމަށް ކުރަމުންދާ ވިއްސާރައަކީ، ތޫފާން ދީތުވާއާއި ގުޅިގެން ކުރާ ވިއްސާރައެކެވެ. ތޫފާން މިހާރު ސްރީލަންކާއާއި ދުރަށް ދަތުރު ކުރަމުން ދިޔަ ނަމަވެސް، ވިއްސާރައިގައި އެޤައުމަށް މިހާރު ވަނީ ފެންބޮޑުވުމާއި ބިންގަނޑު ކަނޑައިގެން ދިޔުން ފަދަ ނުރައްކާތެރި ހާލަތެއް ކުރިމަތިވެފައެވެ. 

Ad by Hajj Corporation