ރާއްޖޭގައި މި ދުވަސްވަރު އަރިދަފުސް ރޯގާ އާއި ނޭވާލާ ނިޒާމަށް ޖެހޭ ބަލިތައް އިތުރުވަމުންދާތީ، އާންމުން އެކަމަށް ރައްކާތެރިވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.

މި ބަލިތަކުން ރައްކާތެރިވުމަށްޓަކައި އަޅަންޖެހޭ މުހިންމު ފިޔަވަޅުތަކެއް އެޗްޕީއޭ އިން ވަނީ ހާމަކޮށްފައެވެ.

Ad by Hajj Corporation

އެޗްޕީއޭގެ އިލްތިމާސްގައިވާ ގޮތުން، ޚާއްސަކޮށް ކުޑަކުދިންނާއި ދުވަސްވީ މީހުން ގިނަގިނައިން މީހުން އެއްވެ އުޅޭ ތަންތަނަށް ނުދިއުމަށް ވަނީ އިރުޝާދު ދީފައެވެ. އަދި ބަލި ޖެހުމުގެ ފުރުސަތު ކުޑަކުރުމަށްޓަކައި، ބަލިމީހުންނަށް ޒިޔާރަތްކުރާނަމަ ކުޑަކުދިން އެފަދަ ތަންތަނަށް ނުގެންދިއުމަށްވެސް އެޗްޕީއޭ އިން ވަނީ އެދިފައެވެ.

ރޯގާގެ އަލާމާތްތައް، ޚާއްސަކޮށް ހުން އައިސްފައިވާ ކުދިން ސްކޫލަށް ނުފޮނުވުމަށް އެޗްޕީއޭ އިން ވަނީ ބާރުއަޅާފައެވެ. މީގެ އިތުރުން، އަރިދަފުސް ރޯގާ ހުރިނަމަ، ނުވަތަ ކެއްސާ ކިނބިހި އަޅާއިރު، ބަލި ފެތުރުން ހުއްޓުވުމަށްޓަކައި ނޭފަތާއި އަނގަ ރަނގަޅަށް ނިވާވާނެހެން މާސްކް އެޅުމަކީ މުހިންމު ކަމެއްކަމަށް އެޖެންސީން ފާހަގަކުރެއެވެ.

ބަލި ފެތުރުން ހުއްޓުވުމަށް އެންމެ މުހިންމު އެއްކަމަކީ އަމިއްލަ ސާފުތާހިރުކަން ކަމަށް އެޗްޕީއޭ އިން ބުނެއެވެ. އެގޮތުން، އަތް ދޮންނަން ޖެހޭ ހާލަތްތަކުގައި ސައިބޯނި ލައިގެން ރަނގަޅަށް އަތް ދޮވުމަށާއި، ނުވަތަ ސެނިޓައިޒަރ ބޭނުންކޮށްގެން އަތް ސާފު ކުރުމަށް ވަނީ އިލްތިމާސްކޮށްފައެވެ.