ތިނަދޫ ސިޓީގައި ފައިސާއަށް ހަށިވިއްކުމުގެ ޢަމަލު ހިންގަމުންދާ ކަމުގެ މަޢުލޫމާތާ ގުޅިގެން ހިންގި އޮޕަރޭޝަނެއްގައި، ބަދުއަޚްލާޤީ ޢަމަލު ހިންގަން ތިއްބާ ދިވެހި ފިރިހެނަކާއި ތައިލެންޑްގެ އަންހެނަކު ފުލުހުންގެ ބެލުމުގެ ދަށަށް ގެނެސްފިއެވެ.

މި ދެ މީހުން ހައްޔަރުކޮށްފައިވަނީ ކުށުގެ ވެށިން ކަމަށް ފުލުހުން ބުނެއެވެ.

Ad by Hajj Corporation

ފުލުހުން މިރޭ ހާމަކުރި ގޮތުގައި، މި އޮޕަރޭޝަން ހިންގާފައިވަނީ 2025 ވަނަ އަހަރުގެ ނޮވެމްބަރު މަހުގެ 28 ވަނަ ދުވަހުގެ ރޭ 23:30 ހާއިރުއެވެ. ފައިސާއަށް ހަށިވިއްކާ ކަމުގެ މަޢުލޫމާތު ލިބުމާ ގުޅިގެން ތިނަދޫގެ ގެއެއް ބަލައި ފާސްކުރުމުގެ ތެރޭގައި މި ދެ މީހުން ވަނީ ހައްޔަރުކޮށްފައެވެ.

ހައްޔަރުކޮށްފައިވާ ދެ މީހުންގެ ތެރޭގައި ހިމެނެނީ 52 އަހަރުގެ ދިވެހި ފިރިހެނަކާއި 39 އަހަރުގެ ތައިލެންޑް އަންހެނެކެވެ. މި ދެ މީހުން ހައްޔަރުކުރީވެސް ބަދުއަޚްލާޤީ ޢަމަލު ހިންގަމުން ދަނިކޮށް ކަމަށް ފުލުހުން ބުންޏެވެ.

މި މައްސަލައާ ގުޅިގެން ހައްޔަރުކުރި ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ދިވެހި ފިރިހެން މީހާ ވަނީ ކަފާލާތުގެ ދަށުން ދޫކޮށްލާފައެވެ. ނަމަވެސް ތައިލެންޑް އަންހެން މީހާއަށް ކޯޓުން ވަނީ 4 ދުވަހުގެ ބަންދުގެ މުއްދަތެއް ދީފައެވެ.

ފުލުހުން ބުނެފައިވަނީ މި މައްސަލަ މިހާރު ދަނީ އިތުރަށް ތަޙްޤީޤު ކުރަމުން ކަމަށެވެ.