މި ސީޒަނުގެ ލަލީގާގެ ޗެމްޕިއަންކަން ކަށަވަރުކޮށްފައިވާ ބާސެލޯނާ، ސީޒަނުގެ ފަހު މެޗުގައި ލެވަންޓޭ އަތުން 3-1 އިން ބަލިވެއްޖެއެވެ. އެސްޓާޑިއޯ ޑި މެސްޓަލާގައި ކުޅުނު މި މެޗުން ބާސެލޯނާ ބަލިވި ނަމަވެސް، އެ ޓީމަށް ކުޅެދިން ފަހު މެޗުގައި ރޮބާޓް ލެވަންޑޯސްކީ ވަނީ ލަނޑެއް ކާމިޔާބުކޮށްފައެވެ.

މެޗުގެ ފުރަތަމަ ހާފުގައި ވެލެންސިއާއިން ގިނަ ފުރުސަތުތަކެއް ތަނަވަސްކުރިއެވެ. އެގޮތުން ޑިއޭގޯ ލޮޕޭޒް ފޮނުވާލި ހަމަލާއެއް ގޯލާ އަމާޒުނުވިއިރު، ހޫގޯ ޑޫރޯ ބޮލުން ފޮނުވާލި ބޯޅަ ދިޔައީ ގޯލުގެ މަތިންނެވެ. ބާސެލޯނާގެ ލެވަންޑޯސްކީ ބޮލުން ފޮނުވާލި ބޯޅައެއް ގޯލުގެ އަރިމަތީ ދަނޑީގައި ޖެހި ވަނީ ނުކުމެފައެވެ.

Ad by Hajj Corporation

މެޗުގެ 60 ވަނަ މިނެޓުގައި ބާސެލޯނާއަށް ލީޑު ނަގައިދިނީ ލެވަންޑޯސްކީއެވެ. މިއީ ފެރަން ޓޮރޭޒް ފޮނުވާލި ބޯޅައެއްގެ މިސްރާބު ބަދަލުކޮށްލައިގެން އޭނާ ކާމިޔާބުކުރި ލަނޑެކެވެ. ނަމަވެސް އޭގެ ފަސް މިނެޓު ފަހުން ވެލެންސިއާގެ ހާވީ ގުއޭރާ ވަނީ ދުރުން ފޮނުވާލި ބާރު ހަމަލާއަކުން ނަތީޖާ އެއްވަރުކޮށްފައެވެ.

ވެލެންސިއާއިން މެޗުގެ ލީޑު ނެގީ 71 ވަނަ މިނެޓުގައެވެ. ގުއޭރާ ފޮނުވާލި ހަމަލާއެއް ބްލޮކްވުމުން ނުކުތް ބޯޅަ ހޯދައި، ލުއިސް ރިއޯޖާ ވަނީ ބާސެލޯނާގެ ދެ ޑިފެންޑަރުން ކައިރިން ނައްޓާލުމަށްފަހު ގޯލުގެ ތެރެއަށް ބޯޅަ ފޮނުވާލާފައެވެ. އަދި މެޗުގެ އިތުރު ވަގުތުގައި ގުއިޑޯ ރޮޑްރިގޭޒް ވަނީ ވެލެންސިއާގެ ތިންވަނަ ލަނޑު ކާމިޔާބުކޮށްދީފައެވެ.

މި މެޗުން މޮޅުވި ނަމަވެސް، ވެލެންސިއާއަށް ޔޫރަޕްގެ މުބާރާތްތަކުން ފުރުސަތެއް ނުލިބުނެވެ. ނަމަވެސް މިއީ ވޭތުވެދިޔަ 11 މެޗުގައި ބާސެލޯނާ އަތުން މޮޅެއް ނުލިބި އޮތް އޮތުމަށް ނިމުން އައި މެޗެކެވެ. އަދި މިއީ ލެވަންޑޯސްކީ ބާސެލޯނާގައި ހޭދަކުރި ފަހު މެޗުގައި އޭނާ ހެދި ރެކޯޑެކެވެ. އެގޮތުން ވެލެންސިއާއާ ދެކޮޅަށް ކުޅުނު 7 މެޗުގައި އޭނާ ވަނީ 10 ލަނޑު ޖަހާފައެވެ.