އާޓިފިޝަލްކޮށް ތައްޔާރުކޮށްފައިވާ ކާނާ ނުވަތަ 'އަލްޓްރާ-ޕްރޮސެސްޑް'ގެ ބަދަލުގައި، ސިއްހަތަށް ފައިދާހުރި ގުދުރަތީ މޭވާއެއް ކަމަށްވާ ކަދުރު ބޭނުންކުރާ މީހުންގެ އަދަދު އެމެރިކާގައި ވަރަށް ބޮޑަށް އިތުރުވާން ފަށައިފިއެވެ. އިންސާނީ ތާރީޚުގައި އެންމެ ކުރީއްސުރެ އިންދާ ހައްދާ އެއް ބާވަތް ކަމަށްވާ ކަދުރުގެ މަގުބޫލުކަން މިހާރު ވަނީ ހުޅަނގުގެ ގައުމުތަކުގައި އިންތިހާއަށް އުފުލިފައެވެ.

ކެލިފޯނިއާގެ އޯގަނިކް ކަދުރު އުފައްދާ ކުންފުންޏެއް ކަމަށްވާ 'ޖޫލީސް' އިން މައުލޫމާތު ދޭ ގޮތުގައި، 2025 ވަނަ އަހަރު އެމެރިކާގައި ކަދުރު ވިއްކި މިންވަރު ވަނީ 33 އިންސައްތަ އިތުރުވެފައެވެ. ފޯޗޫން ބިޒްނަސް އިންސައިޓްސްގެ ރިޕޯޓްތައް ބުނާ ގޮތުން، 2034 ވަނަ އަހަރާ ހަމައަށް އެމެރިކާގެ ކަދުރުގެ މާކެޓް 1.6 ބިލިއަން ޑޮލަރަށް އަރާނެ ކަމަށް ލަފާކުރެވެއެވެ. ހަމައެހެންމެ، އިނގިރޭސިވިލާތުގެ އޮކާޑޯ ގްރޯސަރީގައި މަޖޫލް ކަދުރު ވިއްކި މިންވަރު މިދިޔަ އަހަރާ އަޅާބަލާއިރު 100 އިންސައްތަ ވަނީ އިތުރުވެފައެވެ.

Ad by Hajj Corporation

ސޯޝަލް މީޑިއާގައި ކަދުރު ބޭނުންކޮށްގެން ތައްޔާރުކުރާ 'ހެލްތީ ޑެސާޓް' ނުވަތަ ފޮނިކާތަކެތީގެ ރެސިޕީތައް ވައިރަލްވަމުން ދާއިރު، މިއީ ހަކުރުގެ ބަދަލުގައި ބޭނުންކުރެވޭނެ ރަނގަޅު ބާވަތެއްގެ ގޮތުގައި ގިނަ ބަޔަކު ދަނީ ބަލަމުންނެވެ. ކްލީވްލޭންޑް ކްލިނިކުން ފާހަގަކުރާ ގޮތުގައި ކަދުރުގެ ސަބަބުން ގޮހޮރުގެ ސިއްހަތު ރަނގަޅުވުމާއި، ސިކުނޑީގެ މަސައްކަތްތައް ހަރުދަނާވުމާއި، ހަންގަނޑު ދުޅަހެޔޮވުމުގެ އިތުރުން ތަފާތު ބަލިތަކުން ރައްކާތެރިކޮށްދެއެވެ.

ނިއު ޔޯކް ނިއުޓްރިޝަން ގްރޫޕްގެ ބާނީ ލިސާ މޮސްކޮވިޓްޒް ވިދާޅުވި ގޮތުގައި، "ކަދުރަކީ ކަސްޓަމަރުންނަށް އާ ޓްރެންޑަކަށް ވީނަމަވެސް، ޑައިޓީޝަނުން ސްމޫތީތަކާއި ފޮނިކާތަކެތި ފޮނިކުރުމަށް މީގެ އެތައް އަހަރެއް ކުރިންވެސް ކަދުރު ބޭނުންކުރެއެވެ." އޭނާ އިތުރަށް ފާހަގަކުރެއްވި ގޮތުގައި ކަދުރުގައި ފައިބަރާއި، އެންޓިއޮކްސިޑެންޓްސް އަދި މެގްނީޒިއަމް އާއި ޕޮޓޭސިއަމް ފަދަ މުހިންމު ނިއުޓްރިއެންޓްސް އެކުލެވިގެންވެއެވެ.

ތާރީޚީ ގޮތުން ބަލާއިރު، މެސޮޕޮޓޭމިއާގެ ހަޟާރާތްތަކުގައި މީގެ 6،000 އާއި 8,000 އަހަރު ކުރިންވެސް ކަދުރު ހައްދާފައިވާ ކަމަށް ބެލެވެއެވެ. މެދުއިރުމައްޗާއި އެފްރިކާގެ ސަރަހައްދުތަކުގައި ކަދުރުގެ މާކެޓް ހިއްސާ 2025 ވަނަ އަހަރު 85.28 އިންސައްތައިގައި އޮތްއިރު، މިއީ އިސްލާމީ ސަގާފަތުގައިވެސް ރޯދަ ވީއްލުމަށް ބޭނުންކުރާ ވަރަށް މުހިންމު ބާވަތެކެވެ.

ކަދުރުގައި ގުދުރަތީ ހަކުރު ގިނައިން ހުންނާތީ، އެ ބޭނުންކުރުމުގައި ސަމާލުވުމަށް މޮސްކޮވިޓްޒް އިރުޝާދު ދެއްވައެވެ. "އާދައިގެ ކަދުރު އޮށެއްގައި ގާތްގަނޑަކަށް 15 ގްރާމްގެ ހަކުރު ހުރެއެވެ. އެހެންކަމުން ހަކުރު ބޭނުންކުރާ މިންވަރަށް ސަމާލުވާންޖެހޭ މީހުން، ކަދުރު ކާއިރު ބަދަން ނުވަތަ އޮށް ފަދަ ތަކެއްޗާ އެކު ކެއުމުން ލޭގައި ހަކުރު ހުންނަ މިންވަރު އެއްވަރެއްގައި ހިފެހެއްޓުމަށް އެހީތެރިވެދޭނެއެވެ،" އޭނާ ވިދާޅުވިއެވެ.

ކަދުރަކީ އިސްލާމީ ތާރީހާއި ސަގާފަތުގައި ވަރަށް ހާއްސަ މަގާމެއް އޮތް, ކީރިތި ޤުރުއާނާއި މާތް ރަސޫލާގެ ސުންނަތުން ގިނަގުނަ ފައިދާތަކެއް ބަޔާންވެގެންވާ މޭވާއެކެވެ. އިސްލާމްދީނުގައި ކަދުރަށް ދެވިފައިވާ މުހިންމުކަމުގެ ތެރޭގައި، މާތް ﷲ ކީރިތި ޤުރުއާނުގައި ކަދުރު ރުކާއި ކަދުރަކީ އެކަލާނގެ މަތިވެރި ނިއުމަތެއްގެ ގޮތުގައި އެތައް ފަހަރަކު ސިފަކުރައްވާފައިވެއެވެ. މަރްޔަމް ސޫރަތުގައި, ވިހެއުމުގެ ވޭނުގައި އޮންނެވި މަރްޔަމްގެފާނަށް ކަދުރު ރުކުގެ ކުރި ތަޅުއްވައިލެއްވުމަށް އަމުރުކުރައްވައި, އެއީ އެކަމަނާއަށް ކާންދެއްވި ރިޒްޤެއްގެ ގޮތުގައި ވަނީ ލައްވާފައެވެ. ރޯދަމަހު ރޯދަވީއްލުމުގައި ކަދުރު ބޭނުންކުރުމަކީ މާތް ރަސޫލާގެ ސުންނަތެކެވެ. މުސްލިމުން އާންމުކޮށް ރޯދަ ވީއްލަނީ ކަދުރަކުންނެވެ. ކަދުރަކީ އިންސާނާގެ ހަށިގަނޑަށް ބޭނުންވާ އެތައް ވިޓަމިންތަކާއި މަޢުދަންތަކެއް އެކުލެވިގެންވާ މޭވާއެކެވެ. މީގެއިތުރުން, ދުވަހުގެ ވަރުބަލިކަން ފިލުވައިދީ ހަށިގަނޑަށް ވަގުތުން ހަކަތަ ލިއްބައިދިނުމުގައި ކަދުރުގެ ދައުރު ބޮޑެވެ. އަރަބި ކަރައިގައި އިސްލާމްދީން ފާޅުވެގެންއައި ދުވަސްވަރު އެންމެ އާންމުކޮށް ބޭނުންކުރެވޭ އެއް ކާނާއަކީ ކަދުރެވެ. އެހެންކަމުން މުސްލިމުންގެ ދިރިއުޅުމުގެ ވައްޓަފާޅިއާއި ކެއިންބުއިމުގެ އާދަތަކާ ކަދުރު ވަރަށް ބޮޑަށް ގުޅިފައިވެއެވެ.