އިނގިރޭސިވިލާތުގެ ރޭލެއްގެ ތެރޭގައި އަންހެނަކަށް ޖިންސީ ފުރައްސާރަކުރި މީހަކަށް، އެ ގައުމުގައި އަލަށް އަމަލުކުރަން ފެށި ޖިންސީ ތަފާތުކުރުންތަކާ ގުޅޭ ގާނޫނުގެ ދަށުން ފުރަތަމަ ފަހަރަށް ހުކުމްކޮށްފިއެވެ. މި މައްސަލާގައި ހުކުމް ކުރެވުނީ އުމުރުން 44 އަހަރުގެ ޑޭވިޑް ސްޓްރައުޑްގެ މައްޗަށެވެ.

މި ހާދިސާ ހިނގާފައިވަނީ ހޭސްޓިންގްސް އިން ލަންޑަނަށް ދަތުރުކުރި ރޭލެއްގެ ތެރޭގައެވެ. ސްޓްރައުޑް ވަނީ ރޭލުގައި އިން އަންހެނެއްގެ ކައިރީގައި އިށީނދެ، އޭނާގެ އިސްތަށިގަނޑުގައި ހިފައި، ބޮސްދީފާނެތޯ ސުވާލުކޮށްފައެވެ. މި ހާދިސާ ހިނގާފައިވަނީ ޖިންސަށް ބިނާކޮށް ކުރާ ފުރައްސާރަ މަނާކުރާ އާ ގާނޫނަށް އަމަލުކުރަން ފެށިތާ އެންމެ ދެ ދުވަސް ފަހުންނެވެ.

Ad by Hajj Corporation

ކޯޓުގެ ނިންމުމާއި އަދަބު

ހައިބަރީ ކޯނާ މެޖިސްޓްރޭޓް ކޯޓުން ސްޓްރައުޑްގެ މައްޗަށް އިއްވީ 12 މަސްދުވަހުގެ ކޮމިއުނިޓީ އޯޑަރަކާއި، 150 ގަޑިއިރުގެ ހިލޭ ސާބަހަށް މަސައްކަތް ކުރުމުގެ އަދަބެކެވެ. މީގެ އިތުރުން 15 ދުވަހުގެ ރިހެބިލިޓޭޝަން ޕްރޮގްރާމެއް ފުރިހަމަކުރުމަށާއި، 90 ދުވަސް ވަންދެން ބޯލާ ބުއިންތައް މޮނިޓަރ ކުރާނެ ޓެގެއް އެޅުވުމަށް ވެސް ވަނީ ހުކުމްކޮށްފައެވެ.

ކޯޓުގައި ވާހަކަދައްކަމުން މައްސަލައިގެ ޝިކާރައަކަށްވި އަންހެންމީހާ ބުނީ، އެ ހާދިސާގެ ސަބަބުން އޭނާ ވަރަށް ބޮޑަށް ބިރުގަނެ، މިހާރު އެކަނި ބޭރަށް ނިކުންނަން ވެސް ޖެހިލުންވާ ކަމަށެވެ. "އަހަރެން ހުރީ ބިރުން ގަނޑުވެފައި. އަހަރެންނަކީ އަންހެނަކަށް ވީތީ އެކަނި އެއްވެސް ތަނަކަށް ނުދެވޭނެކަމުގެ އިހުސާސް މިހާރު ކުރެވޭ،" އޭނާގެ ބަޔާނުގައި ބުނެފައިވެއެވެ.

މުހިންމު ފިޔަވަޅެއް

ކްރައުން ޕްރޮސެކިއުޝަން ސާވިސް (ސީޕީއެސް) އިން ބުނި ގޮތުގައި މިއީ އަންހެނުންނާއި އަންހެން ކުދިން ރައްކާތެރިކުރުމަށް އެޅުނު ވަރަށް މުހިންމު ފިޔަވަޅެކެވެ. މިއީ 1986 ވަނަ އަހަރުގެ ޕަބްލިކް އޯޑަރ އެކްޓަށް ގެނެވުނު އިސްލާހުގެ ދަށުން ކުރެވުނު ފުރަތަމަ ހުކުމެވެ. މި ގާނޫނަކީ މަގުމަތީގައާއި އާންމު ދަތުރުފަތުރުގެ ނިޒާމުގެ ތެރޭގައި އަންހެނުންނަށް ކުރާ ފުރައްސާރަ ހުއްޓުވުމަށް ހެދިފައިވާ ގާނޫނެކެވެ.

ބްރިޓިޝް ޓްރާންސްޕޯޓް ޕޮލިސްގެ ޑިޓެކްޓިވް ސުޕްރިންޓެންޑެންޓް ސޭމް ޕެއިންޓަރ ވިދާޅުވީ، މިއީ ހަމައެކަނި ފެށުމެއް ކަމަށާއި، މި ގާނޫނު ތަންފީޒުކުރަން ފެށި ފަހުން މިހާތަނަށް 26 މީހަކު ހައްޔަރުކޮށްފައިވާ ކަމަށެވެ. ސްޓްރައުޑްގެ ވަކީލުން ބުނި ގޮތުގައި އޭނާ މިހާރު ވަނީ ކުރެވުނު ކަންތަކަށް ދެރަވެ، އޭގެ ސީރިއަސްކަން ގަބޫލުކޮށްފައެވެ.