މައިކްރޯސޮފްޓްގެ ބާނީ ބިލް ގޭޓްސް އާއި ކުށްވެރިވެފައިވާ ޖެފްރީ އެޕްސްޓީންއާ ދެމެދު އޮތް ގުޅުމާ ގުޅޭ އާ ތަފްސީލުތަކެއް، ޖަސްޓިސް ޑިޕާޓްމަންޓުގެ ފައިލްތަކުގައި ހުރި އަމިއްލަ މެސެޖުތަކަކުން ހާމަވެއްޖެއެވެ. މި ރިޕޯޓުތަކުގައި ބިލް ގޭޓްސްގެ އަމިއްލަ ދިރިއުޅުމާ ގުޅޭ ހައިރާންކުރުވަނިވި ވާހަކަތަކެއް ވަނީ ފެންމަތިވެފައެވެ.

ޑރ. މެލަނީ ވޯކާގެ މެސެޖުތަކުން ހާމަވި ކަންތައްތައް

Ad by Hajj Corporation

ގޭޓްސް ފައުންޑޭޝަންގެ ކުރީގެ މުވައްޒަފެއް ކަމަށްވާ ޑރ. މެލަނީ އެސް. ވޯކާ، އެޕްސްޓީންއަށް ފޮނުވާފައިވާ އީމެއިލްތަކާއި މެސެޖުތަކުގައި ބިލް ގޭޓްސްއާ ގުޅޭގޮތުން ނޭދެވޭ ވާހަކަތަކެއް ދައްކާފައިވެއެވެ. ވޯކާ ބުނެފައިވާ ގޮތުގައި ގޭޓްސްއަކީ "ވަރަށް ހުތުރު'' މީހެއް ކަމަށާއި އޭނާއަކީ "މީހުން ހީކުރާ ކަހަލަ މީހެއް ނޫން" ކަމަށެވެ.

ވޯކާ އާއި ގޭޓްސްއާ ދެމެދު 2017 ވަނަ އަހަރު ގާތް ގުޅުމެއް އޮތް ކަމަށް ވޯލް ސްޓްރީޓް ޖާނަލްއިން ރިޕޯޓުކޮށްފައިވެއެވެ. އެޕްސްޓީންއާ ކުރި މުއާމަލާތްތަކުގައި ވޯކާ ވަނީ ގޭޓްސް އޭނާއަށް ޖިސްމާނީ ގޮތުން ގޯނާކުރާ ކަމަށް ދޭހަވާ ފަދަ ވާހަކަތަކެއް ދައްކާފައެވެ. އަދި ގޭޓްސްގެ ފަރާތުން ބަދަލުހިފުމުގެ އަމަލެއް އަތުވެދާނެތީ ބިރުގަންނަ ކަމަށްވެސް އޭނާ ބުނެފައިވެއެވެ.

މެލިންޑާ ގޭޓްސްގެ ކަންބޮޑުވުންތައް

މި މެސެޖުތަކުގައި ބިލް ގޭޓްސްގެ ކުރީގެ އަނބިކަނބަލުން މެލިންޑާ ގޭޓްސްއާ ގުޅޭ ވާހަކަތަކެއްވެސް ހިމެނެއެވެ. ވޯކާ ބުނެފައިވާ ގޮތުގައި އޭނާ ފައުންޑޭޝަންގައި ހުރުމުން މެލިންޑާ ނުތަނަވަސްވެ، އޭނާއާ ދެކޮޅަށް ފިޔަވަޅު އަޅަމުންދިޔައެވެ. މެލިންޑާ ވަނީ މީގެ ކުރިންވެސް ބިލް ގޭޓްސް އާއި އެޕްސްޓީންއާ އޮތް ގުޅުމަށް ފާޅުގައި ފާޑުކިޔާފައެވެ.

ގޭޓްސްގެ ފަރާތުން ދިން ރައްދު

ބިލް ގޭޓްސްގެ ތަރުޖަމާނަކު ވިދާޅުވީ، ވޯކާ އާއި އެޕްސްޓީންއާ ދެމެދު އޮތް ގުޅުމުގެ އަސްލު ގޭޓްސްއަށް އެނގިވަޑައިނުގަންނަވާ ކަމަށެވެ. އަދި އެޕްސްޓީން ދިޔައީ ވޯކާ މެދުވެރިކޮށް ގޭޓްސްއާ ނޭދެވޭ ގުޅުމެއް ބޭއްވުމަށް ބާރުއަޅަމުން ކަމަށްވެސް ތަރުޖަމާނު ތުހުމަތުކުރެއްވިއެވެ. ގޭޓްސް ވަނީ މީގެ ކުރިންވެސް އެޕްސްޓީންއާ ގުޅުން ބޭއްވުނީތީ ހިތާމަކުރާ ކަމަށް ވިދާޅުވެފައެވެ.

ވޯކާގެ ވަކީލު ވިދާޅުވި ގޮތުގައި ވޯކާއަކީ އެޕްސްޓީންގެ ފަރާތުން އަނިޔާ ލިބިފައިވާ މީހެކެވެ. އަދި އެޕްސްޓީންއާ އޮތް ގުޅުމަކީ މަޖުބޫރުން އޮތް ގުޅުމެއް ކަމަށްވެސް ވަކީލު ފާހަގަކުރެއްވިއެވެ.