ރ. އަތޮޅު މާމުނަގައު ރިސޯޓްގެ ފަޅުތެރޭގައި އަޅާފައި އޮތް ސީޕްލޭން ޕްލެޓްފޯމެއް ކަނޑައިގެންގޮސް އޮޔާދާތީ، އެކަމަށް ސަމާލުވުމަށް އެމްއެންޑީއެފުން އިލްތިމާސްކޮށްފިއެވެ.

މި ޕްލެޓްފޯމް އޮޔާދާނެކަމަށް ލަފާކުރެވެނީ ކާށިދޫ ކަނޑުތެރެއަށެވެ.

މި ޕްލެޓްފޯމަކީ ކަނޑުއުޅަނދުފަހަރަށް ނުރައްކަލެއް ކުރިމަތިކުރުވާފާނެ އެއްޗަކަށް ވާތީ، އެމްއެންޑީއެފުން ވަނީ މި ސަރަހައްދުން ދަތުރުކުރައްވާ ފަރާތްތަކުން މިކަމަށް ސަމާލުކަންދެއްވުމަށް އިލްތިމާސްކޮށްފައެވެ.

ޚާއްޞަކޮށް ރޭގަނޑު ދަތުރުކުރާ ފަރާތްތަކުން ދަތުރުކުރުމުގައި އިތުރު ސަމާލުކަމެއް ދިނުމަށް އެމްއެންޑީއެފުން ވަނީ ހަނދާންކޮށްދީފައެވެ.

މިކަން ހިނގައިފައި މިވަނީ ރާއްޖޭގެ ސަރަހައްދުގައި ހުޅަނގު މޫސުމުގެ ބާރުގަދަވެ، މި ދުވަސްކޮޅު ރާއްޖޭގެ އެކި ހިސާބުތަކަށް ގަދަ ވިއްސާރަކުރަމުންދާ ދަނޑިވަޅެއްގައެވެ.

ރާއްޖޭގެ މޫސުމާއި ބެހޭ ގައުމީ އިދާރާ، މޯލްޑިވްސް މީޓިއޮރޮލޮޖިކަލް ސާވިސްގެ މެޓް އޮފީހުން ލަފާކޮށްފައިވާ ގޮތުގައި، މިހާރު މިހުރި މޫސުމީ ބަދަލުތަކަށް ލުއިކަމެއް އަންނާނެ ކަމަށް ބެލެވެނީ މާދަމާއިން ފެށިގެންނެވެ.

މެޓް އޮފީހުން މިވަގުތު ވެސް އޮތީ ހއ. އަތޮޅުން ފެށިގެން ތ.އަތޮޅު ހިމެނޭ ސަރަހައްދުތަކަށް މޫސުން ގޯސްވާނެކަމަށް ލަފާކޮށް ހުދުސަމާލުގެ އިންޒާރު ނެރެފައެވެ.