އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސަޢީދުގެ ބައްޕާފުޅު ، ސަޢީދު އަބްދުﷲ، ވިނަރެސް/ ހއ. ތުރާކުނު އަވަހާރަވުމުގެ ހިތާމައިގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތައުޒިޔާ ވިދާޅުވެއްޖެެއެވެ.

ރައީސްގެ ތައުޒިޔާގެ މެސެޖުގައި ވަޒީރު ސަޢީދުގެ ބައްޕާފުޅު ، ސަޢީދު އަބްދުﷲ އަވަހާރަވީ ޚަބަރު އެއްސެވީ ނުހަނު ފުންހިތާމައާއެކުގައިކަމަށް ވިދާޅުވެ މަރުޙޫމްގެ ޢާއިލާއަށް ތަޢުޒިޔާ ދަންނަވައި، ކެތްތެރިކަން ދެއްވުން އެދި ވަނީ ދުޢާ ދަންނަވާފައެވެ.

މަރުޙޫމް ސަޢީދު ޢަބްދުﷲ އަކީ ހއ.ތުރާކުނުގެ ވެރިކަމުގެ ދާއިރާގެ އިސް މަޤާމުތަކުގައި 20 އަހަރަށްވުރެ ގިނަ ދުވަހު ޚިދުމަތް ކުރައްވާފައިވާ، ޤަދަރުވެރި ބޭފުޅެއްކަމަށާއި ޚުލްޤު ހެޔޮ، ދީންވެރި، ހަރުދަނާ ޝަޚްޞިއްޔަތެއްކަން ރައީސްގެ ތައުޒިޔާގެ މެސެޖުގައި އެމަނިކުފާނުވަނީ ފާހަގަކުރައްވާފައެވެ.

ތައުޒިޔާގެ މެސެޖު ނިންމަވާލައްވަމުން ރައީސްވަނީ މާތްﷲގެ ރުއްސެވުމާއި ފުއްސެވުމުގައި، ސުވަރުގޭގެ މަތިވެރި ނިޢުމަތާއި ރަޙްމަތުގައި މަރުޙޫމް ސަޢީދު ޢަބްދުﷲ ލެހެއްޓެވުންއެދި ދުޢާ ދަންނަަވާފައެވެ.

މަރުޙޫމް ސަޢީދު ޢަބްދުﷲއަކީ ގިނަދުވަސްތަކެއްވަންދެން ތުރާކުނު ކަތީބުކަމުގެ މަގާމު ފުރުއްވި ބޭފުޅެކެވެ.