ގުޅިފަޅުން ދޫކުރި ގޯތިތައް އަންނަ އަހަރުގެ ފަހުކޮޅު ކަނޑާފަ ހަވާލުކުރެވޭނެ ކަމަށް ގެދޮރުވެރިކަމާއި ބިމާއި ބެހޭ ވަޒީރު ޑރ. އަލީ ހައިދަރު ވިދާޅުވެއްޖެއެވެ.

ގުޅީފަޅުން ގޯތި ދޫކުރަން ގުރުނެގި ދަރުބާރުގޭގައި ހުންނަވައި "މެންދުރު ޓީވީ" އާ ވާހަކަދައްވަމުން ވަޒީރު ވިދާޅުވީ، ގުޅީފަޅުން ގޯތި ލިބުނު ފަރާތްތަކުގެ ތެރެއިން ގުރުއަތު ނިމޭ ހުރިހާ ފަރާތަތަކަށް ޖިއޯކޯޑަރު ރަޖިސްޓްރީ ހަވާލުކުރުމަށް މަސައްކަތް ކުރާނެ ކަމަށެވެ. އެގޮތުން ހިއްކާފަ އޮތް ތަނަކުން ނަމަ ރަޖިސްޓްރީއެއް އަދި ނުހިއްކާ އޮތް ތަނަކުންނަމަ ގަވާއިދުގައި އޮންނަ ގޮތަށް ލިޔުމެއް ދޫކުރާނެ ކަމަށް ވަޒީރު ވިދާޅުވިއެވެ.

މީގެއިތުރުން ވަޒީރު ވިދާޅުވީ މިހާރު ބްރިޖް ގެ މަސައްކަތް ކުރިއަށް ދާތީ ކޮންސްރަކްޝަން މިނިސްޓްރީ ގެ ހުއްދައާ ނުލާ ގުޅީފަޅު ސަރަހައްދަށް ނުވަދެވޭނެ ކަމަށެވެ. އަދި އަންނަ އަހަރުގެ ފަހުކޮޅާ ހަމައަށް ގޯތި ކަނޑާ ހަވާލުކުރެވޭނެ ކަމަށް އުންމީދުކުރައްވާ ކަމަށް ވެސް ވަޒީރު ވިދާޅުވިއެވެ.

ގުޅީފަޅުން ޖުމްލަ 3،520 ގޯތި ދިނުމަށް ސަރުކާރުން ވަނީ ނިންމާފައެވެ. އޭގެ ތެރޭގައި ހިމެނެނީ 1250 އަކަފޫޓުގެ ގޯތިތަކުން ފެށިގެން 3650 އަކަފޫޓުގެ ގޯތިތަކެވެ. އެ ގޯތިތަކުގެ ތެރެއިން އެންމެ ގިނައީ 1650 އަކަފޫޓުގެ ގޯތިތަކެވެ. އެގޮތުން އެ ސައިޒުގެ 1234 ގޯތި ގުޅީފަޅުން ދިނުމަށް ސަރުކާރުން ވަނީ ނިންމާފައެވެ.