ކިޔަވާ ކުދިންގެ ހިތްތަކުގައި ނޫސްވެރި ކަމަށް އޮންނަ ލޯބި އިތުރަށް ވަރުގަދަ ކުރަންޖެހޭ ކަމަށް ރައީސުލްޖުމްހޫރިއްޔާ ގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ރޭ ބޭއްވި، "11 ވަނަ ނޫސްވެރިކަމުގެ އެވޯޑް” ޙަފްލާ ޝަރަފުވެރިކޮށްދެއްވާ ވާހަކަފުޅުދައްކަވަމުންނެވެ.

އެމަނިކުފާނު ވިދާޅުވީ މަދަރުސާތަކުންނާއި ކޮލެޖް ޔުނިވާސިޓީތަކުން ކިޔަވައިގެން ނިކުންނަ ކުދިންގެ ތެރެއިން އެ ޤާބިލްކަން ހުންނަ ދަރިންގެ ތެރެއިން ނޫސްވެރިން އުފެއްދުމަކީ މިއަދު ކޮންމެހެންވެސް ކުރަންޖެހޭ ކަމެއް ކަމަށެވެ. އަދި ޚަބަރާއި މަޢުލޫމާތު ފެތުރުމުގެ ނޫސްވެރިން ސަމާލުކަން ދޭންޖެހޭ ކަންތައްތަކެއް ހުރިކަން ހަނދާންކުރަންޖެހޭ ކަމަށް ވެސް އެމަނިކުފާނު ވިދާޅުވިއެވެ.

އެގޮތުން، ސައްޙަ މަޢުލޫމާތު ރައްޔިތުންނާ ހަމައަށް ފޯރުކޮށްދިނުމަށް ސަމާލުކަން ދިނުމަށާއި، ހައްސާސް ކަންކަމުގައި ރައްޔިތުންގެ ހިތްތަކުގައި ބިރުވެރިކަން އުފެދޭ ގޮތަށް ޚަބަރާއި މަޢުލޫމާތު ނުފެތުރުވުމަށް ހުރިހާ ނޫސްވެރިންނަށް އެމަނިކުފާނު ވަނީ އިލްތިމާސްކުރައްވާފައެވެ. އަދި އިންސާނީ ކަރާމާތް ގެއްލޭގޮތަށް މީހުންގެ އަބުރާއި އިއްޒަތް ނަގާލުމަށް ދޮގު މަޢުލޫމަތު ޚަބަރު ނުފެތުރުވުމަށް ވެސް އެމަނިކުފާނު ވަނީ ގޮވާލައްވާލައްވާފައެވެ.

މީގެއިތުރުން މީޑިއާތަކުން ފަތުރާ ޚަބަރުތަކާއި މަޢުލޫމާތަކީ ހުރިހާ ޢުުމުރަކާ ގުޅޭ އިޖްތިމާޢީ މިންގަނޑުތަކަށް ފެތޭ ތަކެއްޗެއް ހެދުމަކީ ކޮނެމެހެން ވެސް މުހިންމު ކަމެއް ކަމަށް އެމަނިކުފާނު ވިދާޅުވިއެވެ. އެހެންކަމުން ޚަބަރާއި މަޢުލޫމާތު ފެތުރުމުގައި ގެންގުޅެންޖެހޭ ހަމަތަކަާއި އުސޫލުތައް މީޒާންކޮށް ނުވަތަ ހަމަކޮށް ޒިންމާދާެރު ކަމާއި ތެދުވެރިކަމާއެކު ނޫސްވެރިންގެ ޒިންމާ އަދާކުރުމަށް ހުރިހާ ނޫސްވެރިންނަށް ނަސޭހަތްތެރިވާކަމަށް އެމަނިކުފާނު ވިދާޅުވިއެވެ.