އެފްރިކާ ބައްރުގެ ގައުމެއް ކަމުގައިވާ މޮޒަމްބީކުގެ ވެރިރަށް މަޕޫތޯގައި ހުންނަ މައި ޖަލު ފަޅާލައި 1500 އަށް ވުރެ ގިނަ ކުށްވެރިން ފިލައިފިއެވެ.

އަދި ޖަލުގައި ހިންގި ހަމަނުޖެހުމުގައި 33 މީހުން މަރުވެ 15 މީހުން ޒަހަމް ވެފައިވާ ކަަމަށް މޮޒަމްބީކުގެ ފުލުހުންގެ ވެރިޔާ ބަނަންދީނިޔޯ ރަފައެލް ވަނީ ވިދާޅުވެފައެވެ.

މޮޒަމްބީކުގައި ބޭއްވި ރިޔާސީ އިންތިހާބު ކާމިޔާބުކުރީ އެ ގައުމުގެ ވެރިކަންކުރާ ޕާޓީން ކަމަށް އެ ގައުމުގެ އެންމެ މަތީ ކޯޓުން ނިންމުމުގެ ސަބަބުން އެ ގައުމުގައި ވަނީ ހަމަނުޖެހުންތައް ހިންގަން ފަށާފައެވެ. އަދި އިދިކޮޅު ފަރާތްތަކުން ތުހްމަތުކުރާ ގޮތުގައި ވެރިކަން ކުރާ ޕާޓީން ވަނީ ވޯޓް އޮޅުވާލައި އިންތިހާބު ވަގަށް ނަގައިފައެވެ. އެއާ އެކު މުޅި ގައުމުގައި އުފެދުނު ހަމަނުޖެހުންތަކުގެ ތެރެއިން މިހާތަނަށް 130 އަށް ވުރެ ގިނަ މީހުން ވަނީ މަރުވެފައެވެ.

މޮޒަމްބީކްގެ ފުލުހުން ވަނީ ޖަލުން ފިލި 1،534 މީހުންގެ ތެރެއިން 150 މީހުން އަލުން ހައްޔަރުކޮށްފައެވެ. އަދި ފުލުހުން ވަނީ ކުރިއަށް އޮތް 48 ގަޑިއިރު ތެރޭގައި އެ ގައުމުގައި ހިނގާފާނެ ހަމަނުޖެހުމަކަށް ތައްޔާރަށް ތިބުމަށް ރައްޔިތުންނަށް އިލްތިމާސްކޮށްފައެވެ.