އެމެރިކާއިން ޔަމަނުގެ ސަންއާއަށް ވައިގެ ހަމަލާތަކެއް ދީފިއެވެެ.

އެމެރިކާއިން ބުނީ މި ހަމަލާތައް އަމާޒުކޮށްފައިވަނީ ވެރިރަށް ސަންއާގެ ކައިރި ސަރަޙައްދުތަކަށާއި އުތުރު ސައްދާ ޕްރޮވިންސްއަށްކަމަށެވެ. ހޫތީންނާ ގުޅުންހުރި އަލް މަސީރާ ޓީވީން ރިޕޯޓުކުރި ގޮތުގައި އެމެރިކާގެ ބާރުތަކުން ސައްދާ ޕްރޮވިންސްގެ އެކި ސަރަހައްދުތަކަށް 15 ހަމަލާ ދީފައިވެއެވެ. މީގެ ތެރޭގައި ސައްދާ ސިޓީއާއި މަޖްޒް އަދި ސަހަރު ޑިސްޓްރިކްޓްތައް ހިމެނެއެވެ. މީގެ އިތުރުން ސަންއާ ޕްރޮވިންސްގެ ބަނީ މަތަރު ޑިސްޓްރިކްޓްގައި ހުރި ނަބީ ޝުއައިބް ފަރުބަދައަށްވެސް ހަމަލާ ދީފައިވާކަމަށް ރިޕޯޓުކޮށްފައިވެއެވެ.މި ހަމަލާތަކުގައި މަރުވި މީހުންގެ އަދަދު އަދި ހާމަކޮށްފައެއް ނުވެއެވެ. ނަމަވެސް ހޫތީންގެ ފަރާތުން ބުނެފައިވަނީ މާރިޗު 15 އިން ފެށިގެން މިހާތަނަށް އެމެރިކާގެ ހަމަލާތަކުގައި މަދުވެގެން 61 ލުބުނާނު ރައްޔިތުން މަރުވެފައިވާ ކަމަށެވެ.އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ސޯޝަލް މީޑިއާގައި ދެ ވީޑިއޯއެއް ޝާއިޢުކޮށްފައިވެއެވެ. މި ވީޑިއޯތަކުގައި ފައިޓަރ ޖެޓްތައް ފުރައިގެންދާ މަންޒަރާއި އެއަރކްރާފްޓް ކެރިއަރަކުން މިސައިލްތައް ދޫކޮށްލާ މަންޒަރު ފެނެއެވެ.ޙޫޘީންގެ ފަރާތުން ބުނެފައިވަނީ މާރިބް ޕްރޮވިންސްގެ މަތިން ދުއްވަމުންދިޔަ އެމެރިކާގެ އެމްކިއު-9 ޑްރޯނެއް ވައްޓާލައިފައިވާ ކަމަށެވެ. ޙޫޘީން ސިފައިންގެ ތަރުޖަމާނު ޔަޙްޔާ ސަރީ ބުނެފައިވަނީ މި ޑްރޯން ވައްޓާލީ އަމިއްލައަސޤ އުފައްދާފައިވާ މިސައިލަކުންކަމަށެވެ.އީރާނުން ހޫތީންނަށް ހަތިޔާރު ދޭކަމަށް ބުނެ އެމެރިކާއާއި އިސްރާއީލުން އަންނަނީ ހޫތީންނަށް ހަތިޔާރު ނުދިނުމަށް އީރާނަށް ގޮވާލަމުންނެވެ. ޔަހުދީންނާ ދެކޮޅަށް ރަތް ކަންޑުގައި ހަމަލާތައް ދެނީ މިފަދަ ހަތިޔާރުތަކާ އެކުގައިކަމަށް ޔަހޫދީންނާއި އެމެރިކައިން ތުހުމަތުކުރެއެވެ.

2023 ވަނަ އަހަރުގެ ނޮވެމްބަރުން ފެށިގެން މިއަހަރުގެ ޖަނަވަރީއާ ހަމައަށް ހޫތީން ވަނީ ރަތް ކަނޑުން ދަތުރުކުރި އިސްރާއީލާއި އެމެރިކާއާއި ޣައްޒާ ގެ ގަތުލުއާއްމަށް ތަރުހީބުދޭ ގައުމުތަކަށް ނިސްބަތްވާ 100 އަށްވުރެ ގިނަ ވިޔަފާރި އުޅަނދުފަހަރަށް މިސައިލްތަކާއި ޑްރޯންތަކުން ހަމަލާދީފައެވެ.

މި ހަމަލާތަކާ ގުޅިގެން ބައިނަލްއަޤްވާމީ ކަނޑު ދަތުރުފަތުރަށް ބޮޑެތި ދަތިތަކާ ކުރިމަތިވެފައިވާިއރު ގިނަ ކުންފުނިތަކުން ވަނީ ރަތް ކަނޑު މަގުން ދަތުރުކުރުން ހުއްޓާލާފައެވެ. މިކަމުގެ ސަބަބުން ދުނިޔޭގެ ވިޔަފާރިއަށް ބޮޑެތި އަސަރުތަކެއް ކުރަމުންދާ ކަމަށް ވިޔަފާރީގެ މާހިރުން ބުނެއެވެ.