ރާއްޖޭގައި އުފައްދާ މުދަލުގެ ތެރެއިން އެމެރިކާއަށް އެތެރެކުރާ މުދަލުން 10 އިންސައްތައިގެ ޓެރިފެއް ނަގާނެކަން އެމެރިކާގެ ރައީސް ޑޮނަލްޑް ޓްރަމްޕް އިއުލާނުކުރައްވައިފިއެވެ.

އާއްމުގޮތެއްގައި ރާއްޖެއިން އެމެރިކާއަށް އެތެރެކުރަނީ މަހުގެ ބާވަތްތަކެވެ.

ވައިޓް ހައުސްއިން ވަނީ ގައުމުތަކުން އެތެރެކުރާ މުދަލުން ނަގާނެ އާ ޓެރިފް ރޭޓުތަކާއި ގައުމުތައް އިއުލާނުކޮށްފައެވެ.

އެގޮތުން އަންނަ ހޮނިހިރު ދުވަހުން ފެށިގެން ރާއްޖެއިން އެތެރެކުރާ މުދަލަށް 10 އިންސައްތައިގެ ޓެރިފެއް ދައްކަންޖެހޭނެއެވެ.

މިއީ ސަރަހައްދީ އެހެން ގައުމުތަކާ އަޅާ ބަލާއިރު ނިސްބަތުން ކުޑަ ރޭޓެކެވެ.

އެމެރިކާގެ ރައީސް ޑޮނަލްޑް ޓްރަމްޕް ވަނީ ގިނަ ގައުމުތަކަކުން އެމެރިކާއަށް އެތެރެކުރާ މުދަލުން އައު ރޭޓުގައި ޓެރިފް ނަގާނެކަން އޭޕްރިލްމަހުގެ 2 ވަނަ ދުވަހު ބޭއްވި ނޫސްވެރިންގެ ބައްދަލުވުމެއްގައި ހާމަކޮށްފައެވެ.

ޓެރިފް ރޭޓުތަކަށް ގެނައި ބަދަލާއެކު ދުނިޔޭގެ އިގުތިސާދު މަޑުޖެހިދާނެ ކަމަށާއި އަދި މީގެ ސަބަބުން ގިނަ ޤައުމުތަކުން އެމެރިކާއާ ދެކޮޅަށް ފިޔަވަޅު އަޅާނެ ކަމަށް ބެލެވޭކަމަށްވެސް މީޑިއާތަކުން ރިޕޯޓުކުރެއެވެ.