އެސްޓީއޯގެ މިއަހަރުގެ ދެވަނަ ކުއާޓަރގެ ހިސާބުތަކުން ދައްކާގޮތުން، ކުންފުންޏަށް ފައިދާގެ ގޮތުގައި 574 މިލިޔަން ރުފިޔާ ލިބިފައިވާ ކަމަށް އެ ކުންފުނިން ހާމަކޮށްފިއެވެ.

އެސްޓީއޯގެ ދެވަނަ ކުއާޓަރގެ ތަފާސްހިސާބުތަކުން ދައްކާގޮތުން، ޖުމްލަ އާމްދަނީގެ ގޮތުގައި 3.6 ބިލިޔަން ރުފިޔާ ލިބިފައިވެއެވެ. މިއީ ފުރަތަމަ ކުއާޓަރާ އަޅާބަލާއިރު 12 އިންސައްތައިގެ ދަށްވުމެކެވެ.

އެސްޓީއޯއިން ބުނެފައިވާ ގޮތުގައި، ޖުމްލަ އާމްދަނީ ދަށްވެފައިވަނީ ތެލުގެ އަގުތަކަށް ގެނެވުނު ބަދަލާއި، މި ކުއާޓަރގައި ތެލުގެ ޑިމާންޑް ދަށްވުމާ ގުޅިގެންނެވެ.

އެހެންނަމަވެސް، ކުންފުނީގެ އެހެނިހެން ވިޔަފާރިތަކުން ލިބުނު ޖުމްލަ އާމްދަނީ ވަނީ އިތުރުވެފައެވެ. ނަމަވެސް ކުންފުނީގެ ޖުމްލަ ފައިދާ ދަށްވުމާއި، ހިންގުމުގެ ޚަރަދު އިތުރުވުމާ ގުޅިގެން، ހިންގުމުގެ ފައިދާގެ ގޮތުގައި ލިބިފައިވަނީ 236 މިލިޔަން ރުފިޔާއެވެ. މިއީ ފުރަތަމަ ކުއާޓަރާ އަޅާބަލާއިރު 11 އިންސައްތައިގެ ދަށްވުމެކެވެ.

ޓެކުހަށް ކެނޑުމަށްފަހު، އެސްޓީއޯއަށް މިއަހަރުގެ ދެވަނަ ކުއާޓަރގައި ސާފު ފައިދާގެ ގޮތުގައި ލިބިފައިވަނީ 163.2 މިލިޔަން ރުފިޔާއެވެ. އެއީ ފުރަތަމަ ކުއާޓަރުގައި ލިބުނު 168.7 މިލިޔަން ރުފިޔާއާ އަޅާބަލާއިރު ދަށް އަދަދެކެވެ.