ކަރަންޓު ކެނޑުނު ނަމަވެސް ރައްކާކޮށްފައިހުރި ލޭ އެއްވެސް ވަރަކަށް ކޮމްޕްރޮމައިޒް ނުވޭ: ސީއީއޯ ހަލީމް
9 އޯގަސްޓު 2025 - 13:29

މިއަދު މާލެ ސަރަޙައްދުން ކަރަންޓު ކެނޑުނު ވަގުތު، ރައްކާކޮށްފައިހުރި ލޭ އެއްވެސް ވަރަކަށް ކޮމްޕްރޮމައިޒް ނުވާ ކަމަށް މާލެ ސިޓީ ގްރޫޕް އޮފް ހޮސްޕިޓަލް ގެ ސީއީއޯ އިބްރާހީމް އަބްދުއްރައްޒާގު ހަލީމް ވިދާޅުވެއްޖެ އެވެ.
ސީއީއޯ ހަލީމް މިހެން ވިދާޅުވީ، ކަރަންޓު ބެކްއަޕް ނެތުމުން ތެލެސީމިއާ ޕޭޝަންޓުންނަށް ލޭ އެޅުން މެދުކަނޑާލައިފިވާ ކަމަށާއި، ގިނައިރުވާނަމަ ރައްކާކުރެވިފައިވާ ލޭ ހަލާކުވާނެ ކަމަށް ބުނެ ސޯޝަލް މީޑީޔާގައި ނޫސްވެރިޔަކު ކުރި ޕޯސްޓަކަށް ރައްދުދެއްވަމުންނެވެ.

Ad by Hajj Corporation
އެގޮތުން ހަލީމް ވިދަޅުވީ، ތެލަސީމިއާ ސެންޓަރުގައި ސްޓެލްކޯ ކަރަންޓް ހުރި ކަމަށާއި، ކަރަންޓް ކެނޑުމުން ވަގުތުން ބެކްއަޕް ކަރަންޓްވެސް ފޯރުކޮށްދީފައިވާ ކަމަށެވެ.
އެގޮތުން ލޭއެޅުން މެދުކަނޑާލާފައި ނުވާނެ ކަމަށާއި، ކަރަންޓް ކެނޑުނު ވަގުތު ކްރޮސްމެޗް ހެދުން ފަސް ވަރަކަށް މިނިޓު މަޑުކޮށްލަންޖެހުނު ނަމަވެސް ރައްކާކޮށްފައިހުރި ލޭ އެއްވެސް ވަރަކަށް ކޮމްޕްރޮމައިޒް ނުވާ ކަމަށް ހަލީމް ވިދާޅުވިއެވެ.
އެހެންކަމުން ރައްޔިތުންގެ ހިތުގައި ނުތަނަވަސްކަން އުފެދޭގޮތަށް ތެދުނޫން މައުލޫމާތު ފެތުރުން ހުއްޓާލެއްވުމަށް ސީއީއޯ ވަނީ އިލްތިމާސްކުރައްވާފައެވެ.
ހަލީމް މިފަދައިން ވިދާޅުވި އިރު މޯލްޑިވިއަން ބްލަޑް ސާވިސަސްއިން ވެސް ވަނީ ކަރަންޓު ކެނޑުނު ނަމަވެސް ލޭ އެޅުމާ ގުޅުންހުރި ހިދުމަތްތަކަށް ހުއްޓުމެއް ނާންނާނެކަމުގެ ޔަގީންކަން ދީފައެވެ. އެގޮތުން އެތަނުގައި ހުރި ބެކަޕް ކަރަންޓް ވަގުތުން ބޭނުންކުރެވޭނެ ކަމަށާއި، ބެހެއްޓިފައި ހުރި ލޭގެ ރައްކާތެރިކަމާއި ކޮލިޓީއަށް އަސަރެއް ނުކުރާނެ ކަމަށް އެމްބީއެސް އިން ވަނީ ބުނެފައެވެ.
މޯލްޑިވިއަން ބްލަޑް ސާވިސަސްގެ ތެލެސީމިއާ ސެންޓަރު މިހާރު ހުންނަނީ އޮރެންޖު ހިޔާ ބިލްޑިންގައެވެ. ތެެލެސީމިއާ ސެންޓަރުގެ އިތުރުން މާލެ ސަރަހައްދުގެ ހުރިހާ ހޮސްޕިޓަލެއްގައިވެސް ބެކަޕް ޖެނެރޭޓަރު ހުރެއެވެ. އަދި ކަރަންޓު ކެނޑިއްޖެ ހާލަތެއްގައި އެއްވެސް ހިދުމަތަކަށް ބުރުނާރާނެހެން އަބަދުވެސް ހިދުމަތް ދެއެވެ.