އދ. ގެ ސަލާމަތީ މަޖިލީހުގެ ދާއިމީ މެންބަރުންނަށް ލިބިފައިވާ ވީޓޯ ކުރުމުގެ ބާރު އުވާލެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެ މަޖިލީހުގައި ގޮވާލައިިފިއެވެ.

އދ. ގެ ސަލާމަތީ މަޖިލީހުގައި ރާއްޖޭގެ ރައީސަކު ދެއްވި ފުރަތަމަ ތާރީޚީ ތަގުރީރުގައި ރައީސް ވަނީ، އެ މަޖިލީހުގެ ދާއިމީ މެންބަރުންނަށް ދީފައިވާ ވީޓޯގެ ބާރުގެ ސަބަބުން، އދ. ގެ ނިޒާމަށް ރައްޔިތުން ކުރާ އިތުބާރު ގެއްލިފައިވާކަމަށް ފާހަގުރައްވާފައެވެ.

އެގޮތުން ރައީސް ވިދާޅުވީ، ފަލަސްތީނުގައި އިސްރާއީލުން ހިންގަމުންދާ ލާއިންސާނީ ގަތުލްއާންމުގެ ޢަމަލުތައް ހިންގާއިރު، ބައިނަލްއަގުވާމީ ގާނޫނުގެ ތެރެއިން އެކަން ހުއްޓުވުމަށް އެ މަޖިލިސް ނުކުޅެދިފައިވާ ކަމަށެވެ. އަދި އެ މަޖިލީހަށް އެކަން ހުއްޓުވުމަށް ލިބިފައިވާ ބާރު ކަނޑުވައިލަނީ ވީޓޯގެ ބާރުން ކަމަށާއި، އިސްރާއިލަށް އަދަބެއް ނުދީ، އަނިޔާވެރި އެ އިސްތިއުމާރު ދެމެހެއްޓުމަށް ވެސް މަގުފަހިކޮށްދެނީ ވީޓޯގެ ބާރުން ކަމަށް ރައީސް ވިދާޅުވިއެވެ.

އަޅުގަނޑުމެން މިއަދު މިތާ މި ތިބޭއިރު ބައިނަލްއަގުވާމީ ގާނޫނު ތަންފީޒު ކުރަން ނުކުޅެދި، ފަލަސްތީނުގެ ނަސްލު ނައްތާލުމުގެ ޖަރީމާ [އިސްރާއީލުން] ދަނީ މި ކައުންސިލްގެ ކުރިމަތީގައި ހިންގަމުން. އެ ބާރު މި ކައުންސިލަށް ދެނީ ވީޓޯގެ ބާރުން، - ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު،

ސަލާމަތީ މަޖިލީހަށް ތަގުރީރު ދެއްވުމަށް ރައީސް ވަޑައިގަންނަވަނީ --ފޮޓޯ/ ރައީސް އޮފީސް

އެއާއެކު، އެ މަޖިލީހަށް ރައީސް ކުރެއްވީ ސުވާލެކެވެ.

މި ކައުންސިލުގެ ބާރުގަދަ މެންބަރުން ގައުމުތަކުން ބިނާކޮށްދޭން ބޭނުންވާ ދުނިޔެއަކީ މިއީތޯ،؟ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު،

ރައީސް ވިދާޅުވި ގޮތުގައި، އދ. ގެ ނިޒާމަށް އަދި ސަލާމަތީ މަޖިލީހަށް އިތުބާރު ގެއްލުން ގުޅިފައިވަނީ އެކި ގައުމުތަކާ މެދު ކަންކުރާ އުސޫލުކަމަށެވެ. އެގޮތުން އެ ގައުމުތަކުގެ މެދުގައި ހަމަހަމަ ފުރުސަތު ނުދިނުމާއި، ޒިންމާދާރު ނުކުރުވެމުކީ އޭގެ ސަބަބެއް ކަމުގައި ރައީސް ވިދާޅުވިއެވެ.

އެ މައްސަލަތައް ޙައްލުކުރުމަށްޓަކައި ރައީސް ވިދާޅުވީ، ހައްލު ހޯދޭނެ ނިޒާމެއްގެ ތެރެއިން ބައިނަލްއަގްވާމީ މުޖުތަމައުއިން އީޖާދީ ހައްލު ހުށަހެޅޭނެ އޮނިގަނޑެއް ބިނާކުރުމަށެވެ.

އދ.ގެ ސަލާމަތީ މަޖިލީހަކީ އދ.ގެ މައިގަނޑު ހަ ބާރުގެ ތެރޭގައި ހިމެނޭ މަޖިލީހެކެވެ. ބައިނަލްއަޤްވާމީ ސުލްހަ މަސަލަސްކަމާއި ސަލާމަތާއި ރައްކާތެރިކަން ކަށަވަރުކުރުގެ ބާރު އޮންނަނީ އެ މަޖިލީހުގައެވެ. އަދި އދ.ގެ އާންމު މަޖިލީހުގެ މެންބަރު ގައުމުތަކަށް ގަރާރުތައް ނެރުމުގެ ބާރު ލިބިފައިވާ ހަމައެކަނި މަޖިލީހަކީ ވެސް އެ މަޖިލީހެވެ. އެ މަޖިލިސް އުފެދުނީ ދެވަނަ ބޮޑު ހަނގުރާމައަށް ފަހު ދުނިޔޭގެ ސުލްހަ ދެމެހެއްޓުމަށް، ދުނިޔޭގެ ބޮޑު ފަސް ގައުމެއް ގުޅިގެންނެވެ. އެ ފަސް ގައުމަކީ އެ މަޖިލީހުގެ ދާއިމީ ފަސް ގައުމަށްވާއިރު، ވީޓޯ ކުރުމުގެ ބާރު ވެސް ލިބެނީ އެ ގައުމުތަކަށެވެ. އެ ގައުމުތަކަކީ ޗައިނާ، ފްރާންސް، ރަޝިޔާ، އިނގިރޭސިވިލާތް އަދި އެމެރިކާއެވެ.

އެ ދާއިމީ މެންބަރުތަކަށް ލިބޭ ވީޓޯގެ ބާރަކީ އެ މަޖިލީހަށް ހުށަހެޅުމެއް ނުވަތަ ނިންމުމެއް ބަލައިނުގަތުމުގެ ނުވަތަ މަނާކުރުމުގެ ޤާބިލުކަން އެންމެ މެންބަރަކަށް ވެސް ލިބޭ ބާރެކެވެ. އެ ބާރުގެ ސަބަބުން، އެ މަޖިލީހުގައި ތިބޭ އެހެނިހެން ގައުމުތަކުން ނިންމުމެއް އެއް ގޮތަކަށް ނިންމި ނަމަވެސް، އެންމެ މެންބަރު ގައުމަކުން ނަމަވެސް ވީޓޯކޮށްފި ނަަމަ، އެ އެ ނިންމުން ބަލައި ނުގަންނާނެއެވެ.