މިއަހަރުގެ ދެވަނަ ކުއާޓަރުގައި ދަރަނި ދެއްކުމަށް 3.4 ބިލިޔަން ރުފިޔާ ޚަރަދުކޮށްފައިވާކަމަށް މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާގެ ތަފާސްހިސާބުތަކުން ދައްކައިފިއެވެ.

މާލީ ވުޒާރާއިން އާއްމުކޮށްފައިވާ ތަފާސްހިސާބުތަކަށް ބަލާއިރު ރާއްޖޭގެ ޖުމްލަ ދަރަނި، މި އަހަރުގެ ދެވަނަ ކުއާޓަރު ނިމުނުއިރު ހުރީ 148.9 ބިލިއަން ރުފިޔާގައެވެ.

Ad by Hajj Corporation

މިއީ ގައުމީ އުފެއްދުންތެރިކަމުގެ ނިސްބަތުން ބަލާއިރު 124 އިންސައްތައެވެ.

މި ދަރަނީގެ ތެރޭގައި ދައުލަތުން ސީދާ ނަގާފައިވާ 127.8 ބިލިއަން ރުފިޔާ އާއި ދައުލަތުން ގެރެންޓީ ދީގެން ނަގާފައިވާ 21.1 ބިލިއަން ރުފިޔާގެ ދަރަނި ހިމެނެއެވެ.

ދެވަނަ ކުއާޓަރު ނިމުނުއިރު ދައުލަތުގެ އެތެރޭގެ ދަރަނި 85.8 ބިލިއަން ރުފިޔާގައި ހުރިއިރު ދައުލަތުން ގެރެންޓީ ދީފައިވާ ދަރަނި ވަނީ 21.1 ބިލިޔަން ރުފިޔާގައި ހިފެހެއްޓިފައެވެ. މިއީ ޖީޑީޕީގެ 17.6 އިންސައްތައެވެ.

ކުރީގެ ސަރުކާރުތަކުން މި ސަރުކާރަށް ވާރުތަވި ދަރަނިތަކާއެކު، ބޭރުގެ އެކި ފަރާތްތަކަށް ރާއްޖެއިން ދައްކަންޖެހޭ ޖުމްލަ 42 ބިލިޔަން ރުފިޔާގެ އެންމެ ބޮޑު ހިއްސާއެއް އޮތީ އިންޑިއާގެ އެގްޒިމް ބޭންކަށެވެ. މިގޮތުން، އިންޑިއާގެ އެގްޒިމް ބޭންކަށް، މި އަހަރުގެ ދެވަނަ ކުއާޓަރުގެ ނިޔަލަށް ދައްކަންޖެހޭ ފައިސާގެ އަދަދު 9.2 ބިލިޔަން ރުފިޔާއަށް އަރައެވެ.

އަދި ދިވެހި ދައުލަތުގެ ބޮންޑުތައް ގަނެފައިވާ ބޭރުގެ ފަރާތްތަކަށް 7.7 ބިލިއަން ރުފިޔާ ދައްކަންޖެހެއެވެ. އަދި ޗައިނާގެ އެގްޒިމް ބޭންކަށް 7.3 ބިލިއަން ރުފިޔާ ދައްކަންޖެހޭ ކަމަށް ފިނޭންސް މިނިސްޓްރީގެ ހިސާބުތަކުން ދައްކައެވެ.

މިއާއެކު، ފާއިތުވި ހަފްތާގެ ނިޔަލަށް ދައުލަތުގެ ބަޖެޓުން 24.8 ބިލިއަން ރުފިޔާ ހޭދަކޮށްފައިވާއިރު، އަދި ނިމިގެންދިޔަ އަހަރު މި މުއްދަތުގެ ތެރޭގައި ކޮށްފައިވާ ޚަރަދާ އަޅައިބަލާއިރު މިއަހަރުގެ ޚަރަދު 15.6 އިންސައްތަ ދަށެވެ. އެއާއެކު، ދައުލަތުގެ ބަޖެޓުގެ އޯވަރއޯލް 534.6 މިލިއަން ރުފިޔާގެ ސަރޕްލަސެއްގައި ވަނީ ދެމެހެއްޓިފައެވެ.