މިލަދުންމަޑުލު އުތުރުބުރީ ބިލެތްފަހީގައި ތަރައްޤީކުރާ އެއަރޕޯޓަށް ބޭނުންވާ ބިންހިއްކައި، ގިނަވެގެން 30 މަސްދުވަހުގެ ތެރޭގައި މަސައްކަތްތައް ނިންމައި، އެއަރޕޯޓް ހުޅުވައިދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އެރަށުގެ ރައްޔިތުންނަށް ދެއްވައިފިއެވެ.

މިއަދު ބިލެތްފަހީގައި އެއަރޕޯޓް ތަރައްޤީކޮށް އޮޕަރޭޓްކުރުމުގެ އެއްބަސްވުމުގައި މޯލްޑިވްސް އެއަރޕޯޓްސް ކޮމްޕެނީ ލިމިޓަޑް (އެމް.އޭ.ސީ.އެލް) އާއެކު ސޮއިކުރެވުނެވެ. އަދި މި މަޝްރޫޢުގެ ޢަމަލީ މަސައްކަތް ވެސް މިއަދު ފެށިގެން ދިޔައެވެ.

Ad by Hajj Corporation

ރައީސް މުޢިއްޒު ވިދާޅުވި ގޮތުގައި މި މަޝްރޫޢުގެ ސަބަބުން ރަށާއި ސަރަޙައްދީ ފެންވަރުގައި ބޮޑެތި ފައިދާތަކެއް ލިބިގެންދާނެއެވެ. އަދި މި މަސައްކަތްތައް ކުރިއަށްދާ ގޮތް ކޮންމެ ދުވަހަކު ވެސް ރައްޔިތުންނަށް ފެންނާނެ ކަމަށާއި، މަޑުޖެހުމެއް ނެތި މަސައްކަތް ކުރިއަށް ގެންގޮސް ނިންމައިދެއްވާނެ ކަމުގެ ޔަޤީންކަން ވެސް ދެއްވިއެވެ.

އިތުރު ތަރައްޤީގެ މަޝްރޫޢުތައް

އެއަރޕޯޓުގެ އިތުރުން ވެސް ބިލެތްފަހީގެ ތަރައްޤީއަށް ގިނަ މަޝްރޫޢުތަކެއް ކުރިއަށް ގެންދެވޭނެ ކަމަށް ރައީސް މުޢިއްޒު ވިދާޅުވިއެވެ. މީގެ ތެރޭގައި ފެނާއި ނަރުދަމާ ނިޒާމު، ކުނި މެނޭޖްކުރުމުގެ މަޝްރޫޢު، އަދި ބަނދަރުގެ މަޝްރޫޢު ހިމެނެއެވެ. އަދި ސްކޫލުގައި 8 ކްލާސްރޫމާއި މަލްޓިޕަރޕަސް ހޯލެއް އެޅުމުގެ މަސައްކަތް ވެސް ފެށުމަށް ތައްޔާރުވެފައިވާ ކަމަށް ވިދާޅުވިއެވެ.

މީގެ އިތުރުން ޞިއްޙީ މަރުކަޒުގެ ޚިދުމަތް 16 ގަޑިއިރަށް ފުޅާކުރުމާއި، 2026 ވަނަ އަހަރުގެ ބަޖެޓުގައި ހިމަނައިގެން ހޭންޑްބޯލް އަދި ވޮލީބޯލް ކޯޓަކާއި ޒަމާނީ ފެންވަރުގެ ފުޓުބޯޅަ ދަނޑެއް ތަރައްޤީކުރުމުގެ މަސައްކަތް މި އަހަރު ތެރޭގައި ކުރިއަށް ގެންދެވޭނެ ކަމަށް ވެސް ރައީސް މުޢިއްޒު ވިދާޅުވިއެވެ.