ސަރުކާރުން ރޭވުންތެރިކަމާއެކު ކުރަމުން އަންނަ މަސައްކަތްތައް އަންނަނީ ކާމިޔާބު ވަމުންކަމަށް އެއްވެސް ކަންބޮޑުވުމެއް ނެތްކަމަށް ރައީސް ޑރ. މުހައްމަދު މުޢިއްޒު ވިދާޅުވެއްޖެއެވެ. މިކަން ރައީސް ފާހަގަކުރެއްވީ ށ. އަތޮޅުގެ މީހުން ދިރިއުޅޭ ރަށްރަށަށް ކުރައްވަމުންގެންދަވާ ދަތުރުފުޅުގައި، ބިލެތްފަށީ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.

ރައީސް ވިދާޅުވި ގޮތުގައި ތަރައްޤީގެ މަސައްކަތްތައް ކުރިއަށް ގެންދަވަނީ އޭގެ ފުރިހަމަ ފައިދާ ރައްޔިތުންނަށް ލިބޭނެ ގޮތަށެވެ. އަދި މިކަމުގައި އެއްވެސް ކަންބޮޑުވުމެއް ސަރުކާރަކަށް ނެތެވެ. "އަޅުގަނޑުމެން މިދަނީ އިޤްތިޞާދީ ކަންކަން ރަނގަޅުކުރަމުން، އެތެރެއާއި ބޭރުގެ ދަރަނި ޚަލާސްކުރަމުން، އެކުވެރި ދައުލަތްތަކާ މަޝްވަރާކޮށްގެން ބައެއް ދަރަނިތަކަށް ލުއި ގޮތްތައް ހޯދަމުން" ރައީސް ވިދާޅުވިއެވެ.

Ad by Hajj Corporation

ރައީސް އިތުރަށް ފާހަގަކުރެއްވި ގޮތުގައި 2026 ވަނަ އަހަރަށް ދައްކަންޖެހޭ ސުކޫކު ޕޭމަންޓް ޚަލާސްކުރެއްވުމުގައިވެސް އެއްވެސް ކަންބޮޑުވުމެއް ނެތެވެ. އަދި ރާއްޖޭގެ މާލީ ރިޒާވްގެ ޓްރެޖެކްޓަރީވެސް ހުރީ ރަނގަޅު މިސްރާބަކަށް ކަމަށާއި، ސަރުކާރުން ކުރުވި މަސައްކަތްތަކަށް ދައްކަންޖެހޭ ފައިސާ ކަނޑައެޅިފައިވާ މުއްދަތުގައި ޚަލާސްކުރެވޭނެއެވެ.

ޙަޤީޤީ މާނައިގައި ރައްޔިތުން ބާރުވެރިކުރުވުމަށް ސަރުކާރުން ކުރަމުންދާ މަސައްކަތްތަކަށް އަލިއަޅުވާލައްވަމުން ރައީސް ވިދާޅުވީ، މާލެއަށް ހުރިހާ ބާރެއް ބަރޯސާވެފައި އޮތުމަކީ ލާމަރުކަޒީ ނިޒާމު ނޫންކަމަށެވެ. "އަޅުގަނޑުމެން މިދަނީ ރައްޔިތުންގެ ގާތަށް ގޮސް، ރައްޔިތުންގެ އަޑުއަހައިގެން މަސައްކަތް ކުރަމުން. އޭގެ ނަތީޖާ މިހާރުވެސް ފެންނަމުން އެބަދޭ" ރައީސް ވިދާޅުވިއެވެ.

ރައީސްގެ ވާހަކަފުޅު ނިންމަވާލައްވަމުން، ރައްޔިތުން ބާރުވެރިކުރުވުމަށް ކުރެވެމުންދާ މަސައްކަތްތަކުގެ ބޭނުން ހުރިހާ ފަރާތްތަކުންވެސް ފުރިހަމަގޮތުގައި ހިފުމަށް ގޮވާލެއްވިއެވެ. އަދި މި އުސޫލުން ގެނެވޭ ހުރިހާ ބަދަލަކީވެސް ޙަޤީޤީ މާނައިގައި ރައްޔިތުން ބާރުވެރިކުރުވުމަށް ގެނެވޭ ބަދަލުތަކެއްކަން ފާހަގަކުރެއްވިއެވެ.