އެބޭފުޅާގެ މައްޗަށް އެއްވެސް ނުފޫޒެއް ނުފޯރުވޭނެ ކަމަށާއި، ބިރެއް ވެސް ނުދެއްކޭނެ ކަމުގައި ޕްރޮސެކިއުޓާ ޖެނެރަލް (ޕީޖީ)ގެ މަގާމަށް އަލަށް އައްޔަނުކުރެއްވުނު އައްބާސް ޝަރީފު ވިދާޅުވެއްޖެއެވެ.

ޕީޖީގެ މަގާމަށް އައްޔަނުކުރެއްވުނު ފަހުން ނޫސްވެރިންނާ ފުރަތަމަ ފަހަރަށް ބައްދަލުކުރައްވައްވައި އައްބާސް ވިދާޅުވީ، އައްބާސް އެ މަގާމަށް އައްޔަނުކުރެއްވުނު އިރު، ޕީޖީގެ މަސައްކަތް އެއްވެސް ނުފޫޒެއް ނެތި އަދާކުރެއްވޭނެ ކަމުގެ ޔަގީންކަން ރައީސުލްޖުމްހޫރިއްުޔާ ޑރ. މުޙައްމަދު މުޢިއްޒު ދެއްވި ކަމަށެވެ. އެހެންކަމުން އެފަދަ ނުފޫޒެއް ނެތި މަސައްކަތްކުރުމުގެ ފުރުސަތު އޮތްހާ ދުވަހަކު އެ މަގާމުގައި ދެމިހުންނަވާނެ ކަމުގައި ޕީޖީ ވިދާޅުވިއެވެ.

އަޅުގަނޑަށް [ރައީސް ޑރ. މުޙައްމަދު މުޢިއްޒު] ދެއްވި ޔަގީންކަމަކީ އަޅުގަނޑަށް އެއްވެސް ނުފޫޒެއް ނުފޯރުވާނަމޭ. އަޅުގަނޑުގެ ގޮތުގައި މަސައްކަތްކުރަން ބޭނުންވާ ފްރީޑޮމް އަޅުގަނޑަށް ދެއްވާނަމޭ. އެ ފްރީޑޮމްއާ އެއްކޮށް މަސައްކަތްކުރެވޭހާ ދުވަހަކު އަޅުގަނޑު މަސައްކަތްކުރާނީ. އެ ނެތްކަން އަޅުގަނޑަށް އެނގޭ ދުވަހަކު އަޅުގަނޑު [ޕީޖީގެ މަގާމުގައި] ނުހުންނާނަން. އަޅުގަނޑު ޖެހިލުމެއް ނުވޭ މި ވާހަކަ ބުނާކަށް، - ޕްރޮސެކިއުޓާ ޖެނެރަލް އައްބާސް ޝަރީފު

ނުފޫޒުގެ ވާހަކަ ދައްކަވަމުން ޕީޖީ އިތުރަށް ވިދާޅުވީ، ކުރީގެ ރައީސް މައުމޫން އަބްދުލް ގައްޔޫމުގެ އަރިހުގައި ވެސް އެބޭފުޅާ މަސައްކަތްކުރެއްވި ކަމަށާއި، އޭގެ ފަހުން ހައި ކޯޓުގައި ވެސް މަސައްކަތްކުރެއްވި ކަމަށެވެ. އެހެން ނަމަވެސް އެ ކޯޓުގެ މަސައްކަތްތަކުން އެކަހެރިވި އިރު ވެސް، އެއްވެސް ނުފޫޒެއްގެ ވާހަކައެއް ފެންމަތިވެފައިނުވާނެ ކަމަށެވެ.

އެއާއެކު ޕީޖީ ވިދާޅުވީ، ކުރިން ރައީސް އޮފީހުގައި މަސައްކަތްކުރެއްވި ނަމަވެސް، މި ވަގުތު ހުންނެވީ ރާއްޖޭގެ ޕީޖީގެ މަގާމުގައި ކަމުގައި ވުމުން، މިހާރު މަސައްކަތް ކުރައްވާނީ ވެސް އެގޮތަށް ކަމަށެވެ. އެހެން ނަމަވެސް، އެއްވެސް ބޭފުޅަކަށް އެބޭފުޅާގެ މައްޗަށް ނުފޫޒެއް ނުފޯރުވޭނެ ކަމަށާއި، ބިރެއް ވެސް ނުދެއްކޭނެ ކަމަށް ޕީޖީ ވިދާޅުވިއެވެ.

ނުފޫޒެއް އެއްވެސް މީހަކަށް އަޅުގަނޑު މައްޗަކަށް ނުފޯރުވޭނެ. ބިރެއް ވެސް ނުދެއްކޭނެ. އަޅުގަނޑު ޑިޒިޝަން ނަގާނީ އަޅުގަނޑު އެބަލަންވާ ވަރަށް ބަލާފައި، އަޅުގަނޑު ގަބޫލުކުރާ ގޮތަށް އަޅުގަނޑު ޑިޒިޝަން ނަގާނީ، - ޕްރޮސެކިއުޓާ ޖެނެރަލް އައްބާސް ޝަރީފު

ޕީޖީ ވިދާޅުވި ގޮތުގައި އެއްވެސް މީހަކު ނުވަތަ އެއްވެސް މުއައްސަސާއަކުން އެބޭފުޅާއަށް ނުފޫޒު ފޯރުވައި، އެބޭފުޅާގެ ނިންމުމެއް ބަދަލުކުރަން މަޖުބޫރުކުރާ ދުވަހަކުން އެ މަގާމުން އިސްތިއުފާ ދެއްވާނެއެވެ.

ޕީޖީގެ މަގާމަށް އައްބާސް އައްޔަނުކުރެއްވީ ހުސްވި ސެޕްޓެމްބަރު މަހުގެ 18 ވަނަ ދުވަހުއެވެ. އައްބާސް އެ މަގާމަށް އައްޔަނުކުރެއްވީ، އެ މަގާމަށް އައްބާސް އައްޔަނުކުރަން ފެންނަ ކަމަށް މަޖިލީހުން ރުހުން ދިން ދުވަހުގެ އަނެއް ދުވަހުއެވެ. އެގޮތުން މަޖިލީހުގެ ދައުރުން ބޭއްވި އެ ޖަލްސާގައި އައްބާސްއަށް ރުހުން ދިނީ، 85 މެންބަރުންގެ ވޯޓުންނެވެ. އައްބާސްއަށް ރުހުން ނުދޭން އެއްވެސް މެންބަރަކު ވޯޓު ދެއްވާފައެއް ނުވެއެވެ.

ޕީޖީގެ ކުރިން އައްބާސް ހުންނެވީ ރައީސް އޮފީހުގެ ލީގަލް ސެކެޓްރީގެ މަގާމުއެވެ.