ޕްރޮސެކިއުޓާ ޖެނެރަލް (ޕީޖީ)ގެ އޮފީހުން ނިންމާފައިވާ ކުރީގެ ނިންމުންތަކާ ގުޅޭ ޝަކުވާތައް ހުށަހަޅަން އެ އޮފީހުން މިއަދު ހުށަހަޅައިފިއެވެ.

އެކަމާ ގުޅޭ ގޮތުން މައުލޫމާތު ދެއްވަމުން މިއަދު އޮތް ނޫސްވެރިންގެ ބައްދަލުވުމުގައި ޕީޖީ އައްބާސް ޝަރީފް ވިދާޅުވީ، ބައެއް ނިންމުންތަކާ ގުޅޭ ޝަކުވާތައް އެކި ގޮތްގޮތަށް އެ އޮފީހަށް އެކި ފަރާތްތަކުން ހުށަހަޅައި، އަދި ހުށަހަޅަމުންދާ ކަމަށެވެ. އެހެންކަމުން އެ ޝަކުވާތައް އެއް ޕްލެޓްފޯމެއްގެ ތެރެއިން ހުށަހެޅުމުގެ ފުރުސަތު ދިނުމަށް، މިއަދުން ފެށިގެން 20 ދުވަހުގެ ނިޔަލަށް އެ ފުރުސަތު ހުޅުވާލައިފައިވާ ކަމަށް ޕީޖީ ވިދާޅުވިއެވެ.

އެގޮތުން ހުށަހެޅޭ ޝަކުވާގެ ތަފްސީލު ވީހާ ވެސް ރަނގަޅަށް ދެއްވުމަށް ޕީޖީ އެދިވަޑައިގެންނެވިއެވެ. ޕީޖީ ވިދާޅުވި ގޮތުގައި އެ ޝަކުވާތައް ދިރާސާކޮށް، އެ މައްސަލަތައް ރިވިއުކުރަން ޖެހޭ ނަމަ، އެކަމެއް ނިންމާނީ ޕީޖީ އެކުކަވާލާ އެތެރޭގެ ކޮމެޓީއަކުންނެވެ. އެ ކޮމެޓީގައި ޕީޖީ ވެސް ހިމެނިވަޑައިގަންނަވާނެއެވެ.

ޕްރޮސެކިއުޓާ ޖެނެރަލް އައްބާސް ޝަރީފު -- ފޮޓޯ/ މިހާރު

އަދި އެ ކޮމެޓީން ނިންމާ ނިންމުމެއް ނިންމާ ސަބަބު ވެސް، ފުރިހަމައަށް ހާމަކުރައްވާނެ ކަމުގައި ޕީޖީ ވިދާޅުވިއެވެ.

ކުރީގެ ޕީޖީ، ހުސައިން ޝަމީމުގެ ބައެއް ނިންމުންތަކާ ގުޅޭ ގޮތުން ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުން ޕީޖީ އައްބާސް ވިދާޅުވީ، ޕީޖީ ޝަމީމުގެ ނިންމުންތައް އިސްވެ ރިވިއުކުރުމުގެ ވިސްނުމެއް ނެތް ކަމަށެވެ. އެހެން ނަމަވެސް، އެ ނިންމުންތަކާ ގުޅޭ ގޮތުން ވެސް އާންމުންގެ ޝަކުވާއެއް ލިބިފައިވާ ނަމަ، އެ ނިންމުމެއް ބަލައި ރިވިއުކުރާނެ ކަމަށް ޕީޖީ ވިދާޅުވިއެވެ. ޕީޖީ ވިދާޅުވި ގޮތުގައި، އެފަދައިން ޢަމަލުކުރައްވަން ނިންމެވީ ޒާތީ ގޮތުން ވަކި މީހަކަށް އަމާޒުކޮށް ޕީޖީން ގޮތް ނިންމި ކަމަށް ތުހުމަތު ކުރުމުގެ ޖާގަ ދޭން ބޭނުން ނުވާތީއެވެ.

އަޅުގަނޑަށް އޭރުން އަންނާނެ އެލިގޭޝަން (ތުހުމަތު)، ކުރިން ނިންމި ނިންމުން ހާއްސަކޮށް ބަދަލުކޮށްފިއްޔާ، އެ މީހަކާ މެދު ޒާތީ ތައައްސުބަކުން ވިސްނާފައޭ ޕީޖީ އެ ގޮތަށް އެކަން ކުރީ، - ޕްރޮސެކިއުޓާ ޖެނެރަލް އައްބާސް ޝަރީފް

ޕީޖީ އެފަދައިން ވިދާޅުވި އިރު، ކުރީގެ ޕީޖީ ޝަމީމު މަގާމުން ވަކިކުރުމަށް ހުށަހެޅި މައްސަލައިގައި ވެސް، އޭނާގެ މައްޗަށް ފަސް މައްސަލައެއް ނިންމީ ގޯސްކޮށް ކަމަށް ތުހުމަތުކޮށްފައިވެއެވެ.

ކުރީގެ ޕްރޮސެކިއުޓާ ޖެނެރަލް ހުސައިން ޝަމީމް -- ފޮޓޯ/ ސަން

އޭގެ ތެރޭގައި ކުރީގެ ފަތުރުވެރިކަމާ ބެހޭ ވަޒީރު އަލީ ވަހީދުގެ ރޭޕް ކޭސްގެ މައްސަލައިގައި ދައުވާ ނުކުރަން ނިންމެވުމާއި، ސަފާރީގައި އަންހެނަކު ރޭޕްކުރި މައްސަލައިގައި ދަށު ކޯޓުގެ ނިންމުން އިސްތިއުނާފު ނުކުރަން ނިންމެވުމާއި، ކުރީގެ ޔޫތު މިނިސްޓަރު އަހުމަދު މަހުލޫފްގެ މައްޗަށް ކުރި އެމްއެމްޕީއާރުސީގެ ކޮރަޕްޝަންގެ މައްސަލަ ފައިލުކުރުމާއި އަދި ކޮވިޑް ތެރޭގައި ވެންޓީލޭޓަރުތަކެއް ގަތުމަށް ކުރި މުއާމަލާތުގެ ތެރޭގައި ހިމެނޭ ކޮރަޕްޝަންގެ މައްސަލައިގައި ދައުވާ ނުކުރުން ހިމެނެއެވެ.

އެ ހުރިހާ މައްސަލަތަކަށް ވެސް ޝަމީމު ވަނީ އިންކާރުކޮށްފައެވެ.