ހުސްވެފައިވާ ޕްރޮސެކިއުޓާރ ޖެނެރަލް (ޕީޖީ)ގެ މަގާމަށް ހައިކޯޓުގެ ކުރީގެ ފަނޑިޔާރު އައްބާސް ޝަރީފްގެ ނަން ރައްޔިތުންގެ މަޖިލީހަށް ފޮނުއްވައިފިއެވެ.

ޕީޖީގެ މަގާމަށް ބޭފުޅަކު އައްޔަންކުރަނީ މީގެ ކުރިން އެމަގާމުގައި ހުންނެވި ޝަމީމް ގެ މައްޗަށް ކުރެވުނު ތުހުމަތުތަކާއި ގުޅިގެން މިދިޔަ މަހުގެ 22 ވަނަ ދުވަހު އެ މަޤާމުން ޝަމީމު ވަކިކުރުމަށް މަޖިލީހުން ފާސްކޮށްފައިވާތީއެވެ.

ރޭ މަޖިލީހުގެ ދައުރުން ބޭރުން ބޭއްވި ފުރަތަމަ ޖަލްސާގައި ވަނީ ޕީޖީގެ މަގާމަށް އައްޔަން ކުރެއްވުމަށްޓައި ރައީސް، ޑރ. މުހައްމަދު މުއިއްޒު ފޮނުއްވެވި ސިޓީފުޅު މަޖިލީހުގައި އިއްވާފައެވެ. އަދި އެ ސިޓީފުޅުގައި އޮތް އައްބާސްގެ ނަން ދިރާސާ ކުރުމަށް މަޖިލީހުގެ ޖުޑިޝަރީ ކޮމިޓީއަށް ވަނީ ފޮނުއްވާފައެވެ.

ޖުޑިޝަރީ ކޮމިޓީން ވަނީ އައްބާސްއާ ގުޅޭގޮތުން އެއްވެސް ޝަކުވާއެއްވާނަމަ އަންނަ ހޯމަ ދުވަހުގެ 12:00 އާ ހަމައަށް ހުޅުވާލާފައެވެ.

މައުލޫމާތު ލިބިފައިވާ ގޮތުގައި ޕީޖީގެ މަގާމަށް އައްޔަންކުރަން ހަ ބޭފުޅަކު ވަނީ ކުރިމަތިލާފައެވެ. އެ ހުރިހާ ބޭފުޅުންގެ ނަންތައްވެސް ރައީސް ވަނީ މަޖިލީހަށް ފޮނުއްވާފައެވެ.

ޕީޖީގެ މަގާމަށް އައު ބޭފުޅަކު އައްޔަންކުރަން ނިންމަވާފައިވާއިރު، ކުރީގެ އެމަގާމުގައި ހުންނެވި ޝަމީމުގެ މައްޗަށް ހުށަހެޅުނު މައްސަލަތަކަކީ އެއްވެސް އަސްލެއް ނެތް ތުހުމަތުތަކެއް ހިމެނޭ މައްސަލަތަކެއް ކަމުގައި މީގެ ކުރިން ޝަމީމް ބުނެފައިވެއެވެ.