އާދިއްތަ ދުވަހު ބޭންކުގެ ކާޑު ލިމިޓަށް ގެނައި ބަދަލާ ގުޅިގެން އެއީ "މާލީ ބަގާވާތެއް" ކުރަން އުޅުން ކަމަށްބުނެ އެ މައްސަލަ ފުލުހުން ތަހުގީގުކުރަން ފަށައިފިއެވެ.

ފުލުހުން ނެރުނު ބަޔާނެއްގައި ވަނީ ސަރުކާރުގެ މައި ހިއްސާ އޮންނަ ބޭންކަކުން ސަރުކާރުގެ މަޝްވަރާއާއި ޚިލާފަށް ދިވެހި ގިނަ ރައްޔިތުންނަށް ކުއްލި ސިހުމެއް ލިބޭފަދަ ނިންމުމެއް ނިންމި ވަގުތާއި ދިމާކޮށް ސިޔާސީ ފަރާތްތަކުން ސަރުކާރުގެ މާލީ ހާލަތާއި ބެހޭ ގޮތުން ނޫސްވެރިންގެ ބައްދަލުވުމެއް ބާއްވާފައިވާކަމަށެވެ.

ހަމަ އެވަގުތު މީސްމީޑިއާގައި އެތައް ސަތޭކަ ބޮޓް އެކައުންޓް ބޭނުންކޮށް ސަރުކާރު ވައްޓާލުމަށް މަގުތަކަށް ނިކުތުމަށާއި އާއްމު ހަމަޖެހުން ނަގާލުމަށް ގޮވައި ގައުމުގެ މަސްލަހަތު ނަގާލުމަށް ހިތްވަރުދީ ހަދާފައިވާތީ މިކަމަކީ ގާނޫނީ ސަރުކާރެއް ޢައިރު ގާނުނީ ކޮށް ބަދަލުކޮށްލުމަށް ކުރެވިގެންދިޔަ ކަމެއް ކަމަށްް ބެލުމުގެ ޖާގަ އޮތުމުން މި މައްސަލަ ދިވެހި ފުލުހުން ތަޙުޤީގު ކުރަން ވަނީ ފަށާފައެވެ.

މިރޭ ޕީ.އެން.ސީ ހަރުގޭގައި ބޭއްވި ބައްދަލުވުމުގައި މިކަމާ ގުޅިގެން ވާހަކަ ދައްކަވަމުން މަސްވެރިކަމާބެހޭ ވަޒީރު އަޙްމަދު ޝިޔާމް ވިދާޅުވީ، ރައްޔިތުން، ބޭންކު ކާޑަށް ބަރޯސާވާއިރު މިގޮތަށް ކަން ކުރުމަކީ މާލީ ބަގާވާތެއް ކަމަށެވެ.

"ރައްޔިތުން އާމްދަނީ ހޯދަމުން ދާ ސޯސް މިއަދު ބޭންކަށް މި އޮންނަނީ ބަރޯސާވެފައި، އެކާޑަށް މި އޮންނަނީ ބަރޯސާވެފައި، ކިޔަވާ ކުދިން މި އޮންނަނީ އެ ކާޑަށް ބަރޯސާވެފައި، ކުދި ވިޔަފާރިތައް ކުރާ ފަރާތްތައް އެކާޑަށް ބަރޯސާވެފައި މި އޮންނަނީ މި ގޮތަށް އިރު އަރާފައި ސަރުކާރުގެ ނުރުހުމާއެކީ އެފަދަ ފިޔަވަޅެއް އެޅިގެން ނުވާނެ އެއީ ބަގާވާތުގެ ބައިވެރިން" ޝިޔާމް ވިދާޅުވިއެވެ.