އިނގިރޭސި ގައުމީ ޓީމުގެ ކޯޗަކަށް، ތަޖުރިބާކާރު ކޯޗު ޕެޕް ގުއާޑިއޯލާ އައުން ގާތް ކަމުގައި ބޭރުގެ ރިޕޯޓުތަކުން ބުނެފިއެވެ.

ގުއާޑިއޯލާ މިހާރު ކޯޗުކަން ކޮށްދެނީ އިނގިރޭސި ގަދަބާރު، މެންޗެސްޓާ ސިޓީއަށެވެ. އެ ޓީމާއެކު އޮތް އޭނާގެ ކޮންޓްރެކްޓް، މި އަހަރުގެ ސީޒަން ނިމުމުން ހަމަވާނެއެވެ.

Ad by Hajj Corporation

މީގެ ކުރިން ވެސް ސިޓީ ދޫކޮށް، އެހެން ޓީމަކަށް ގުއާޑިއޯލާ ބަދަލުވެދާނެ ކަމުގެ އަޑުތަކެއް ފެތުރުުނު ނަމަވެސް، އެ ވާހަކަތަކަށް އޭނާ ޖަވާބު ދީފައެއް ނުވެއެވެ. އެގޮތުން ބޭރު ދުނިޔޭގެ ކުޅިވަރު ނޫސްވެރިއެއް ކަމުގައިވާ ފެބްރީޒިއޯ ރޮމާނޯ ރިޕޯޓުކުރާ ގޮތުގައި، އިނގިރޭސި ޓީމުގެ ކޯޗަކަށް ގެންނަ ފަރާތްތަކުގެ ލިސްޓުގައި ގުއާޑިއޯލާ ހިމެނެއެވެ. އަދި އެކަން އެހެން ވުން ވެސް ވަރަށް ގާތް ކަމުގައި އޭނާ ރިޕޯޓުކޮށްފައިވެއެވެ.

އެހެން ނަމަވެސް އެކަމާ ގުޅޭ ގޮތުން ސުވާލުކުރުމުން ގުއާޑިއޯލާ ބުނި ގޮތުގައި، މިވަގުތު އޭނާގެ ފޯކަސް ހުރީ ސިޓީއާއެކު ތަށިތައް ހޯދުމަށެވެ. އެހެންކަމުން އެކަމާ ވާހަކަ ދައްކަންވީ ވަގުތަކީ މިއީ ނޫން ކަމުގައި ފެބްރީޒިއޯއަށް ދިން އިންޓަވިއުއެއްގައި ގުއާޑިއޯލާ ބުނެފައިވެއެވެ.

ކާމިޔާބު އަދި ތަޖުރިބާކާރު ކޯޗު ގުއަޑިއޯލާ ސިޓީއާ ގުޅުނީ 2016 ވަނަ އަހަރުއެވެ. އެ އަހަރުގެ ފަހުން މިހާތަނަށް އޭނާ ވަނީ އެ ޓީމާއެކު ހަ ފަހަރު އިނގިރޭސި ޗެމްޕިއަންކަން، ދެ ފަހަރު އެފްއޭކަޕް، ލީގު ކަޕް ހަތަރު ފަހަރު އަދި އިނގިރޭސި ސުޕަ ކަޕް ތިން ފަހަރު ކާމިޔާބުކޮށްފައެވެ. މީގެ އިތުރުން އޭނާ އަކީ ސިޓީއަށް ޗެމްޕިއަންސް ލީގު އަދި ޔުއެފާ ސުޕަކަޕް ހޯދައިދިން ހަމައެކަނި ކޯޗު ވެސް މެެއެވެ.