އެމްޑީޕީއަށް ނިސްބަތްވާ ކައުންސިލަރުންނަށް އެ ޕާޓީގެ އެތެރޭގައި މަސައްކަތް ކުރެވޭނެ އިންތިޒާމެއް ހަމަޖެއްސުމަށްޓަކައި އަސާސީ ޤަވާއިދަށް ބަދަލު ގެނައުމުގެ މަސައްކަތް ކުރަމުންދާ ކަމަށް އެމްޑީޕީގެ ޗެއަރޕާސަން ފައްޔާޟް އިސްމާޢީލް ވިދާޅުވެއްޖެއެވެ.

ފައްޔާޟް މިހެން ވިދާޅުވީ، އެމްޑީޕީގެ ޤައުމީ މަޖިލީހަށް އަލަށް އިންތިޚާބުވި މެންބަރުންނާއެކު ރޭ ބޭއްވުނު އެޕާޓީގެ ޤައުމީ މަޖިލީހުގެ ބައްދަލުވުމުގައި ވާހަކަ ދައްކަވަމުންނެވެ. މި ބައްދަލުވުމުގައި ގިނަ މެންބަރުން ވަނީ މި ކަމަށް ތާއީދުކުރައްވާ ވާހަކަފުޅު ދައްކަވާފައެވެ.

ފައްޔާޟް ވިދާޅުވި ގޮތުގައި މިހާރު އެމްޑީޕީގެ ސިޔާސަތުތައް ކަނޑައެޅުމުގައި އަދި ޕާޓީގެ ހަރަކާތްތަކުގެ ތެރޭގައި ޕާޓީއަށް ނިސްބަތްވާ ކައުންސިލަރުންނާއި އަންހެނުންގެ ތަރައްޤީއަށް މަސައްކަތް ކުރާ މެންބަރުންގެ މާ ބޮޑު ދައުރެއް ނެތެވެ. ނަމަވެސް މި ފަރާތްތަކުގެ ދައުރެއް ޕާޓީގެ ތެރޭގައި ބޭއްވުމަށްޓަކައި އަސާސީ ޤަވާއިދަށް އިޞްލާޙު ގެނައުމަށް ވަނީ ނިންމާފައެވެ.

"އަޅުގަނޑު ގެންނާނަން އަސާސީ ޤަވާއިދަށް ކުދިކުދި ބަދަލުތަކެއް ކައުންސިލަރުންނާއި އެއްކޮށް ޕާޓީގެ ހަރަކާތްތައް ކުރިއަށް ގެންދިއުމަށްޓަކައި ކައުންސިލްތަކާއި ޑަބްލިއުޑީސީ ޕާޓީގެ ސްޓްރަކްޗަރ ތެރެއަށް ވެއްދުމުގެ ޑްރާފްޓެއް،" ފައްޔާޟް ވިދާޅުވިއެވެ.

މި ބަދަލުތަކުގެ ސަބަބުން އެމްޑީޕީގެ އެތެރޭގެ ހިންގުމުގައި ކައުންސިލަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންގެ ދައުރު އިތުރުވެގެންދާނެ ކަމަށް ބެލެވެއެވެ.