އިޒްރޭލުން އީރާނަށް ދިން ހަމަލާ ކުށްވެރިކޮށް ސައުދީ އަރަބިއާގެ ފޮރިން މިނިސްޓްރީން ބަޔާނެއް ނެރެފި އެވެ.

އިޒްރޭލުން ވަނީ ވައިގެ މަގުން އީރާނުގެ ވެރިރަށް ތެހެރާން ހިމެނޭހެން އެ ގައުމުގެ ސަރަހައްދުތަކަށް ހަމަލާދީފައެވެ.

Ad by Hajj Corporation

މި ހަމަލާއާއި ގުޅިގެން ސައޫދީން ނެރުނު ބަޔާނުގައި، ސައުދީ އަރަބިއާގެ ރަސްގެފާނު ސަލްމާން ބިން އަބްދުލްއަޒީޒް އަލްސައުދު ވަނީ އިޒްރޭލް އިން އީރާނަށް ދިން ހަމަލާ ހަރުކަށި އިބާރާތުން ކުށްވެރިކުރައްވާފަ އެވެ.

މި ބަޔާނުގައި ބުނެފައިވަނީ އީރާންގެ ސިޔާދަތަށް އަރައިގަތުމާއި، ބައިނަލްއަގްވާމީ ގާނޫނުތަކާއި އުސޫލުތަކާ ހިލާފަށް ދިން މި ހަމަލާއާއި ގުޅިގެން ކަންބޮޑުވާ ކަމަށެވެ.

ސަރަޙައްދުގެ ހަމަޖެހުމާއި އިސްތިގުލާލަށް ނުރައްކާވާ ފަދަ ގޮތަކަށް ހިނގަމުންދާ ހަނގުރާމަވެރި އަމަލުތައް ހުއްޓާލުމަށް މިބަޔާނުގައި ގޮވާލާފައިވާއިރު، މެދުއިރުމަތީގެ ގައުމުތަކާއި ރައްޔިތުންގެ ސަލާމަތާއި ރައްކާތެރިކަމަށް ނުރައްކާވާ ފަދަ ކޮންމެ ކަމަކަށް ސައުދީ ސަރުކާރުން ދެކޮޅު ހަދާނެ ކަމަށްވެސް ބަޔާނުގައި ސައޫދީން ބުނެފަވެއެވެ.

އިޒްރޭލުން އީރާނަށް އަމާޒުކޮށް ދިން އަސްކަރީ ހަމަލާތަކަކީ އީރާނުގެ އިސްތިގުލާލާއި ބައިނަލްއަގްވާމީ ޤާނޫނުތަކާ ޚިލާފު ހަމަލާތަކެއް ކަމަށް ބުނެ ދިވެހި ސަރުކާރުން ވެސް ވަނީ އެކަން ހަރުކަށި އިބާރާތުން ކުށްވެރިކޮށްފައެވެ.