ރާއްޖޭގައި މުޅިން އަލަށް އުފެދޭ ސިފައިންގެ މެރިޓައިމް އެލިޓް ޔުނިޓް ކަމުގައިވާ ކޯސްޓްގާޑް ސްޕެޝަލް ބޯޓް ސްކޮޑްރަން އިފްތިތާހުކޮށްފިއެވެ.

އެ ޔުނިޓު އިފްތިތާޙްކުރީ މިއަދު ހަވީރު، މާލޭގެ ޖުމްހޫރީ މައިދާނުގައި ބޭއްވި ސިފައިންގެ އަސްކަރީ ހުށަހެޅުމުގެ ތެރެއިންނެވެ. އެގޮތުން އެ ޔުނިޓް އިފްތިތާހްކުރުމުގެ ގޮތުން އެ ޔުނިޓުގެ ޕެނެޓް އެ ސްކޮޑްރަން އާއި ހަވާލުކޮށްދެއްވީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުހައްމަދު މުއިއްޒުއެވެ.

މިއަދު ހަވީރު އޮތް އެ ހަރަކާތުގައި ވަނީ ނިރުބަވެރި ޖަމާއަތަކުން ރާއްޖެއަށް ދޭން ޕްލޭންކުރި ހަމަލާއަކުން ރާއްޖެ ސަލާމަތްކުރުމަށް ސިފައިން ހަރަކާތްތެރިވާނެ ގޮތުގެ ބައެއް މަންޒަރުތައް ދައްކަފައެވެ. އެގޮތުން އެ އޮޕަރޭޝަން ކުރިޔަށް ގެންދިޔައީ ސިފައިންގެ އެއްގަމާއި، ކަނޑާއި، އަދި ވައިގެ ސްކޮޑުތައް ހިމެނޭހެންނެވެ. އެ ސްކޮޑުތަކުން އެ ހާލަތުގައި އަމަލު ކުރާނެ ގޮތް ސިފައިން ވަނީ ދައްކާފައެވެ. އަދި ސިފައިންގެ ބޭންޑުގެ ޚާއްސަ ލަވައެއް ވެސް އެ ހަރަކާތުގައި ވަނީ ކުޅެފައެވެ.

އެ ހުށަހެޅުން ބައްލަވާލެއްވުމަށް ރާއްޖޭގެ ރައީސް ޑރ. މުޙައްމަދު މުޢިއްޒުގެ ދެ ކަނބަލުންގެ އިތުރުން، އެމަނިކުފާނުގެ ޢާއިލާގެ ބޭފުޅުންނާއި، ވަޒީރުންނާއި އަދި ދައުލަތުގެ އިސްވެރިން ބައިވެރިވެވަޑައިގެންނެވިއެވެ.

މިއީ ގިނަ އަހަރުތަކަކަށް ފަހު، ނަސްރުގެ ދުވަސް ފާހަގަކުރާ ފުރަތަމަ ފަހަރެވެ. އެގޮތުން އެ ދުވަސް ފާހަގަކުރުމަށްޓަކައި މިއަދު ހެނދުނު ވެސް ގިނަ ހަރަކާތްތަކެއް ވަނީ ކުރިއަށް ގެންގޮސްފައެވެ. އޭގެ ތެރޭގައި ސިފައިން ޖަމާއަތުގައި ފަތިސް ނަމާދު ކުރުމާއި، ނަސްރުގެ ދުވަހުގެ މޮނިއުމެންޓުގައި ދިދަ ޖެހުމުގެ އިތުރުން، ނަސްރުގެ ދުވަހަށް ޚާއްސަކޮށް މައުރަޒެއް ވެސް ވަނީ ހުޅުވައިފައެވެ. އެ ހުރިހާ ހަރަކާތެއްގައި ވެސް ރައީސް ޑރ. މުހައްމަދު މުޢިއްޒު ބައިވެރިވެވަޑައިގެންނެވިއެވެ.

އަދި މިރޭ، ނަސްރުގެ ދުވަހުގެ ރަސްމީ ޖަލްސާ ބޭއްވުމަށް ވެސް ވަނީ ހަމަޖެހިފައެވެ. އެ ޖަލްސާގައި ރައީސް މުޢިއްޒު ގައުމާ މުޚާތަބުކުރައްވާނެއެވެ.