ރިސޯޓުތަކުން ޑޮލަރު މާރުކުރަން ޖެހޭގޮތަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭރު ފައިސާގެ ގަވާއިދަށް ގެނައި ބަދަލަށް އަމަލު ނުކުރާނެކަން، ރާއްޖޭގައި ގިނަ ރިސޯޓުތަކެއް ހިންގާ ޔުނިވާސަލް ގްރޫޕުންވެސް އަންގައިފި އެވެ.

ރިސޯޓުތަކުން ރާއްޖޭގެ ބޭންކުތަކަށް ޑޮލަރު މާރު ކުރަން ޖެހޭގޮތަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭރު ފައިސާގެ ގަވާއިދަށް ވަނީ ބޮޑެތި ބަދަލްތަކެއް ގެނެސްފަ އެވެ.

މިކަމާ ގުޅިގެން ރިސޯޓުތައް ހިންގާ ރާއްޖޭގެ ބައެއް ވިޔަފާރިވެރިން ވަނީ ކަންބޮޑުވުންފާޅުކޮށްފައެވެ.

ރާއްޖޭގައި ގިނަ ރިސޯޓުތަކެއް ހިންގާ ޔުނިވާސަލް އެންޓަޕްރައިސަސްގެ ޗެއާމަން، މުހައްމަދު އުމަރު މަނިކު (އެމްޔޫ މަނިކު) މުހައްމަދު މޫސާ (ޗަންޕާ އުއްޗު) ވަނީ އެމްއެމްއޭއިން މިގެނައި ބަދަލަށް އަމަލު ނުކުރާނެ ކަމަށް އަންގާ އެމްއެމްއޭގެ ގަވަރުނަރ އަހުމަދު މުނައްވަރު އަށް ސިޓީއެއް ފޮނުއްވާފަ އެވެ.

ޔުނިވާސަލްގެ ޗެއާމަން މުހައްމަދު އުމަރު މަނިކު ފޮނުވި ސިޓީގައި ބުނެފައިވަނީ ބޭންކުތަކަށް ޑޮލަރު މާރުކުރާގޮތަށް އެމްއެމްއޭއިން ނިންމު ނިންމުމަކީ ޓޫރިޒަމް އިންޑަސްޓްރީގެ އެއްވެސް ބަޔަކާ މަޝްވަރާކުރުމެއް ނެތި ހަދާފައިވާ ގަވާއިދެއް ކަމަށެވެ.

ރިސޯޓުތަކުގެ ރޫމް ރޭޓަށް ބެލުމެއް ނެތި 500 ޑޮލަރު މާރުކުރަން ކަނޑައެޅުމަކީ ސަބަބުވެރި ނިންމުމެއް ނޫންކަމަށާ، ރިސޯޓުތަކުން ކުރާ ހަރަދުގެ 90 އިންސައްތަ ހަރަދު ކުރަނީ ޑޮލަރުންކަމަށް އެ ސިޓީގައި ބުނެފައިވެއެވެ. ޔުނިވާސަލްގެ ކޮންމެ ރިސޯޓެއްގެ އަހަރީ އާމްދަނީ 30 އިންސައްތަ އަށްވުރެ މަތީ އަދަދެއް ޓެކްސްގެ ގޮތުގައި ދައުލަތަށް ދައްކާ ކަމަށްވެސް ސިޓީގައި ބުނެފައިވެއެވެ.

އެހެންވީމާ އެމްއެމްއޭގެ މި ނިންމުމަކީ ރިސޯޓް ހިންގާ މީހުންނަށް އިންސާފުވެރި ގޮތެއް ނޫންކަމަށްވެސް އުމަރު މަނިކު ފޮނުވި ސިޓީގައި ބުނެފައިވެ އެވެ.

ޔުނިވާސަލް އިން ރާއްޖޭގައި ހިންގަމުން އަންނަ ރިސޯޓު ތަކަކީ ކުރުނބާ މޯލްޑިވްސް އާއި ވެލައްސަރު މޯލްޑިވްސް އާއި ބަރޮސް މޯލްޑިވްސް އާއި ހުވަފެންފުށި މޯލްޑިވްސް އާއި ކުރަމަތި މޯލްޑިވްސް އާއި މިލައިދޫ މޯލްޑިވްސް އަދި ދިގަލި މޯލްޑިވްސް އެވެ.

ޗަމްޕާ ބްރަދާސްގެ ވެރިޔާ މުހައްމަދު މޫސާ (އުއްޗު) އެމްއެމްއޭގެ ގަވަރުނަރަށް ފޮނުވި ސިޓީގައި ބުނެފައިވަނީ ކޮންމެ މަހަކު ރިސޯޓުތަކަށް އަންނަ ޓޫރިސްޓެއްގެ ބޮލަކަށް 500 ޑޮލަރުގެ ރޭޓުން ރާއްޖޭގެ ބޭންކްތަކުން ޑޮލަރު މާރުކުރުމަކީ ވިޔަފާރިއަށް ގެއްލުންވާނެ ކަމެއް ކަމަށެވެ. ޓުރިޒަމް އިންޑަސްޓްރީއަށް ހާއްސަކޮށްގެން މިފަދަ ފިޔަވަޅެއް އެޅުމަކީ ވަރަށް ބޭ އިންސާފު ކަމެއް ކަމަށް އުއްޗުގެ ސިޓީގައި ބުނެފައިވެ އެވެ.

އެމްއެމްއޭގެ މިނިްމުމަކީ ޓްއަރިޒަމް އިންޑަސްޓްރީގެ އެއްވެސް ބަޔަކާ މަޝްވަރާ ކުރުމެއް ނެތި ނިންމާފައިވާ ނިންމުމެއް ކަމުން އެނިންމުން އަނބުރާ ގެންގޮސް އެކަން މުރާޖާ ކުރުމަށް އުއްޗު ވަނީ ގަވަރުނަރުގެ އަރިހުން އެދިވަޑައިގެންފަ އެވެ.

އެ ގަވާއިދުގެ ސަބަބުން އިންވެސްޓަރުންގެ އިތުބާރު ގެއްލި، ޓްއަރިޒަމް ދާއިރާއަށާއި ރާއްޖޭގެ އިގްތިސޯދަށް އެކަމުގެ ނޭދެވޭ އަސަރު ކުރާނެ ކަމަށް އުއްޗުބުނެފައިވެ އެވެ.