ބޭރު ޤައުމެއްގެ ބޯޓެއް، ޤާނޫނާ ޚިލާފަށް ރާއްޖޭގެ ސަރަޙައްދުގައި އުޅެނިކޮށް އަތުލައިގަނެފި. މި ބޯޓު އަތުލައިގަތީ އެމްއެންޑީއެފް އެއަރ ކޯރގެ ޑްރޯން ބޭނުންކޮށްގެންނާއި އަދި އެމްއެންޑީއެފް ކޯސްޓްގާޑުން ގުޅިގެން ރާއްޖޭގެ އުތުރުގެ ސަރަހައްދު ބެލެހެއްޓުމަށް ހިންގި ޚާއްޞަ އޮޕަރޭޝަނެއްގައެވެ. ޑްރޯނުން ވަނީ ބޭރު ޤައުމެއްގެ ބޯޓެއް، ޤާނޫނާ ޚިލާފަށް ރާއްޖޭގެ ސަރަޙައްދުގައި އުޅެނިކޮށް ލޮކޭޓްކޮށްފައެވެ.

ކޯސްޓްގާޑުން މި ބޯޓް އިންޓަރސެޕްޓް ކުރުމަށްފަހު މިހާރު ވަނީ ކޯސްޓްގާޑްގެ ބެލުމުގެ ދަށަށް ގެންގޮސްފައެވެ.

އަސްކަރީ ތިން ޑްރޯން ބޭނުންކޮށްގެން އެމްއެންޑީއެފުން ވައިގެ މަގުން ރާއްޖޭގެ ސަރަހައްދު ބަލަހައްޓަން ފަށާފައިވަނީ މާޗް މަހުގެ 15 ގައެެވެ.

ތުރުކީން ގެނެސްފައިވާ މި ޑްރޯންތަކަކީ އެ ގައުމުން އުފައްދާފައިވާ "ބައިރަކްތާރު ޓީބީ2" ގެ ތިން ޑްރޯންއެވެ. ސަރުކާރުން ނިންމާފައިވަނީ ޖުމުލަ ހަތް ޑްރޯން ގެންނާށެވެ.

ތުރުކީގެ ޑްރޯން ކުންފުނި، ބައިކާރުން އުފެއްދި ޑްރޯންތަކުގެ ތެރޭގައި "ބައިރަކްތާރު ޓީބީ2" ޑްރޯން ނެރެފައިވަނީ 2014 ވަނަ އަހަރުގެ ތެރޭގައެވެ.ދިގުމިނުގައި ހަ މީޓަރު އަދި ފިޔަގަނޑުގައި 12 މީޓަރު ހުންނަ މި ޑްރޯން އަކީ 27 ގަޑިއިރަށްވުރެ ގިނައިރު އުދުއްސޭ އުޅަނދެކެވެ. ގާތްގަނޑަކަށް 700 ކިލޯގެ މި ޑްރޯން 25،000 އަށްވުރެ ފޫޓު މަތިން އުދުއްސޭނެއެވެ. އަދި މި ޑްރޯންގައި 70 އާއި 120 ނޮޓުގެ ސްޕީޑުގައި ދުއްވުމުގެ ގާބިލުކަން ހުރެއެވެ.