logoEN
ޚަބަރު

އެމްއެންޑީއެފުން 17,000 ޓަނުގެ ފެން ހިންދައިފި

މާލެ ސަރަހައްދުގައި އެމްއެންޑީއެފުން ފެން ހިނދުމުގެ މަސައްކަތުގެ ތެރެއިން--ފޮޓޯ: އެމްއެންޑީއެފް

މާލެ ސަރަހައްދުގައި އެމްއެންޑީއެފުން ފެން ހިނދުމުގެ މަސައްކަތުގެ ތެރެއިން--ފޮޓޯ: އެމްއެންޑީއެފް

މާލެއިން އެކަނި މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން މިހާތަނަށް 16،911 ޓަނުގެ ފެން ހިނަދައިފިއެވެ.

އެމްއެންޑީއެފުން ވަނީ މާލޭގެ ފަސް ސަރަހައްދެއްގައި ފެން ހިންދުމަށް 13 ޕަންޕު ބަހައްޓައިގެން މަސައްކަތްކޮށްފައެވެ. މިއާއެކު އެމްއެންޑީއެފުން ކުރިއަށްގެންދިޔަ އޮޕަރޭޝަންގައި މާލޭގެ 131 ގެއަކަށް އެހީތެރިކަން ފޯރުކޮށްދީ، 976 ވެލި ބަސްތާ ވަނީ ޖަހައިދީފައި ވެސްވެއެވެ. އަދި މި އޮޕަރޭޝަންގައި ކ.ހުރާ، ކ.ގުރައިދޫ، ކ.ހިންމަފުށި، ކ.ތުލުސްދޫ ކ.މާފުށި، އދ.މާމިގިލީގައި ފެން ހިންދުމުގައި ވެސް ސިފައިން ވަނީ ހަރަކާތްތެރިވެފައެވެ.

މީގެ އިތުރުން ރާއްޖެއަށް މިހާރު މި ކުރަމުންދާ ވިއްސާރައިގައި ދ.މީދޫ އަދި ފ.ނިލަންދޫއަށް ބޯކޮށް ވާރޭވެހި ފެން ބޮޑުވުމުން، އެ ރަށްރަށަށް އެހީތެރިކަން ފޯރުކޮށްދިނުމުގައި އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ހަރަކާތްތެރިވަމުންދާ ކަމަށްވެސް އެމްއެންޑީއެފުން މައުލޫމާތުދެއެވެ.

މިއާއެކު މާލޭ ސަރަހައްދުގެ ފެންބޮޑުވެފައިވާ ސަރަހައްދުތައް އާންމު ހާލަތަށް ގެނެވިފައިވާތީ، ފެން ހިންދުމުގެ މަސައްކަތް ވަނީ ވަގުތީ ގޮތުން މަޑުޖައްސާލާފައެވެ.

މޫސުމާއި ބެހޭ ގައުމީ އިދާރާއިން ކުރިން ހާމަކޮށްފައިވާ ގޮތުގައި، މާދަމާއާއި ހަމައަށް ވެސް ރާއްޖޭގެ ބޮޑު ސަރަހައްދަކަށް ވިއްސާރަ ކުރާނެއެވެ. ވަކިން ޚާއްސަކޮށް މެދުރާއްޖެތެރެއާއި ދެކުނުގެ އަތޮޅުތަކަށް ގުގުރުމާއެކު ބޯކޮށް ވާރޭ ވެހި، ވައިވެސް ގަދަވާނެ ކަމަށް އެ އިދާރާއިން ވަނީ ބުނެފައެވެ.

ކޮމެންޓް

871x217_placeholder