މާލޭގައި އަދިވެސް ކެމިކަލް ގުދަންތައް ހުރިކަމުގެ ކަންބޮޑުވުން މޯލްޑިވްަސް ނޭޝަނަލް ޑިފެންސް ފޯސް (އެމްއެންޑީއެފް)އިން ފާޅުކޮށްފިއެވެ.

މެންދުރު ޓީވީއަށް ދިން އިންޓަވިއުއެއްގައި އެމްއެންޑީއެފްއިން މިހާރު މާލޭގައި ކުރިއަށްގެންދާ "އޮޕަރޭޝަން ހިރާސް ފާސް" ގެ އަދާހަމަ ހިއްސާކުރައްވަމުން އޮޕްރޭޝަންގެ އިންޗާޖު ބްރިގޭޑިއަރ ޖެނެރަލް ޒުހުރީ ވިދާޅުވީ މާލެ ސަރަހައްދުގައި މިހާރު ކުރިއަށްދާ މި އޮޕަރޭޝަނުގެ ތެރެއިން ގިނަ ކަންތައްތަކެއް ފާހަގަވަމުން އަންނަކަމަށެވެ.

ކެމިކަލް ރައްކާކުރާ ތަންތަން ހުރިތޯ ބެލުމަށް ހިންގާ އޮޕަރޭޝަނެއްގައި 508 ތަނެއް ބަލައި ފާސްކޮށްފިން. މާލެއިން 45 ފިހާރަ 74 ގުދަން ޗެކްކުރެވިއްޖެ. ފާހަގަވީ ޗެކްކުރަންދާއިރު އެބަ ހުރޭ ބަންދުކޮށްފައިވެސް. މާލެގައިވެސް ގުދަންތައް އެބަހުރި . މިއީ ފާހަގަވީ ކަންކަން.

މި އޮޕަރޭޝަންގެ މާލޭގެ ބައިގައި ޖުމުލަ 10 ޓީމު ބައިވެރިވެފައިވެއެވެ.

މި އޮޕަރޭޝަނަކީ މާލޭގައި ހުރި ކެމިކަލް ގުދަންތަކާއި ސްޓީލް ސްޓްރަކްޗަރތަކުގެ ތަފްސީލީ މައުލޫމާތު އެއްކޮށް، އެ ތަންތަނުގެ ރައްކާތެރިކަން ކަށަވަރުކުރުމާއި، އެފަދަ ތަންތަނުގެ ސަބަބުން ދިމާވެދާނެ ނުރައްކާތެރި ހާދިސާތަކަށް ތައްޔާރުވުމަށް ކުރިއަށް ގެންދިޔަ އޮޕަރޭޝަނެކެވެ.

އެމްއެންޑީއެފް އިން ބުނީ އޮކްޓޫބަރު މަހުގެ 1 އިން 15 އަށް ކުރިއަށްގެންދިއުމަށް ހަމަޖެހިފައިވާ މި އޮޕަރޭޝަނުގައި، ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން ހިންގަނީ ގަވާއިދާ އެއްގޮތަށްތޯ ބެލުމުގެ އިތުރުން، ގްރޭޓަރ މާލެ އޭރިއާގައި ފަސޭހައިން އަލިފާންރޯވާ ފަދަ ތަންތަނާއި އެ ތަންތަނުގައި ހުރި ހިރާސްތައް ވެސް މި އޮޕަރޭޝަންގެ ތެރެއިން ދެނެގަންނާނެ ކަމަށެވެ.