ޤާނޫނު އަސާސީގެ މައްޗަށް ފައިންއެރި ބަޔަކަށް ހިމާޔަތް ކުރެވޭނީ ކޮން ޤާނޫނު އަސާސީ އެއްތޯ ވިދާޅުވެ މާލޭ ސިޓީގެ ޑެޕިއުތީ މޭޔަރު އަހުމަދު ނަރީޝް އިދިކޮޅު ފަރާތްތަކަށް ސުވާލެއް އަމާޒުކުރައްވައިފިއެވެ.

ނަރީޝް މިފަދައިން ސުވާލު އަމާޒުކުރައްވާފައިވާ ދަނޑިވަޅަކީ ގާނޫނު އަސާސިއަށް ގެނައި އިސްލާހުތަކާމެދު ނުރުހުން ފާޅުކޮށް އިދިކޮޅު އެމްޑީޕީން އަންނަ މަހުގެ 10 ވަނަ ދުވަހު "ގާނޫނު އަސާސީ"ގެ ދިފާއުގައި ކަމަށްބުނެ ބޮޑު ޖަލްސާއަކަށް ތައްޔާރުވަމުން އަންނަ ދަނޑިވަޅެކެވެ.

މިކަމާ ގުޅިގެން ނަރީޝް އިތުރަށް ވިދާޅުވީ އެމްޑީޕީގެ ވެރިކަމުގައި ދިވެހީންގެ ޤާނޫނު އަސާސީގައި ލިޔެފައިވާ ދިވެހީންގެ މިނިވަންކަމާއި ސިޔާދާއި، ދިވެހީންގެ ދީން ކަމުގައިވާ އިސްލާމްދީނުގެ ހުރުމަތް ކެނޑުމަށް ކުރި މަސައްކަތާއި، ދިވެހީންގެ ސަރަހައްދު ކަމުގައި އެ ޤާނޫނު އަސާސީގައި ބުނެފައިވާ ސަރަހައްދުން ބައެއް ބޭރުގެ ބަޔަކަށް ވިއްކާލަން ކުރި މަސައްކަތާއި، ދިވެހީންގެ ދިވެހި ވަންތަކަން ނަގާލައި އަމިއްލަ ގައުމުގައި ދެވަނަ ދަރަޖައިގެ ރައްޔިތުންނަށް އެ ރައްޔިތުން ހަދަން ކުރި މަސައްކަތް ދިވެހީން ހަނަދާނުން ފިލައިގެން ނުދާކަމަށެވެ.

"ނަމުގައި ޤާނޫނު އަސާސީގެ ދިފާއުގައި ކަމުގައި ބުނެ ދިވެހީންގެ ވެރިކަން ވައްޓާލާ ގައުމު ހަލަބޮލި ކުރަން އެމްޑީޕީން ޖަހަން ތިޔަރާވާ ސަކަރާތް ރައްޔިތުންނަށް މިއަދު މާ ސާފު. ދިވެހީންނަކީ ސުލްހަ މަސަލަސްކަމާއި އަމާން ކަމަށް ލޯބިކުރާ ބައެއް."

މި ޖަލްސާ ބޭއްވުމަށް ހަމަޖައްސާފައިވަނީ އަންނަ ޑިސެމްބަރު 10 ވަނަ ދުވަހު މާލޭގައެވެ.މި ޖަލްސާ ބާއްވާ ދުވަހަކީ ރާއްޖޭގެ މަސްވެރިންގެ ދުވަހާއި ބައިނަލްއަގްވާމީ އިންސާނީ ހައްގުތަކުގެ ދުވަހެވެ.

އެމްޑީޕީ އިން ބުނާ ގޮތުގައި މެންބަރުންގެ ގޮނޑި ގެއްލޭނެ ގޮތްތަކެއް ކަނޑައަޅައި ގާނޫނުއަސާސީއަށް ގެނައި އިސްލާހު ތަކަކީ މިނިވަންކަމާ އެކު މަސައްކަތް ކުރައްވަންޖެހޭ މެންބަރުންގެ މަސްއޫލިއްޔަތުތަކާއި ޒިންމާތަކަށް އަރައިގަތުމަށް ގެނެސްފައިވާ އިސްލާހުތަކެކެވެ.