މިއުނިކް، ޖަރުމަނުވިލާތް - ބަޔަރން މިއުނިކްގެ ކެނެޑިއަން ޑިފެންޑަރު އަލްފޮންސޯ ޑޭވިސް ބުރާސްފަތި ދުވަހުގެ ފަތިހު މަސްތުގެ ހާލުގައި ލެމްބޯގިނީ އުރަސް ކާރެއް ދުއްވަނިކޮށް މިއުނިކް ފުލުހުން ހިފަހަށްޓައިފިއެވެ.ބިލްޑް އޮންލައިންގެ ރިޕޯޓުގައި ބުނެފައިވާ ގޮތުގައި، މިޔުނިކްގެ މަގެއްގައި ފަތިހު 2:15 ހާއިރު ފުލުހުން ވަނީ ޑޭވިސް ހިފަހައްޓާފައެވެ. އޭނާ ހިފެހެއްޓީ އޭނާގެ ޢަމަލުތަކުން ފުލުހުންގެ ޝައްކު އުފެދުމާ ގުޅިގެންނެވެ.ފުލުހުން އޭނާ ހުއްޓުވި އިރު، އޭނާގެ ކިބައިން ބަނގުރަލުގެ ވަސް ދުވުމާ ގުޅިގެން ބްރެތްލައިޒަރ ޓެސްޓެއް ހަދާފައިވެއެވެ. މި ޓެސްޓުން ދައްކާފައިވަނީ އޭނާގެ ލޭގައި ލީޓަރަކަށް 0.6 ގްރާމްގެ މިންވަރަށް ބަނގުރާ ހުރި ކަމަށެވެ.މި މައްސަލައާ ގުޅޭ ގޮތުން ޖިނާއީ ވަކީލު ޑރ. ޖެނާރޯ ފެސްޓާ ވިދާޅުވެފައިވަނީ، މި މިންވަރަކީ ކުށެއްގެ ގޮތުގައި ބެލެވޭ މިންވަރެއް ކަމަށާއި، ޖިނާއީ ކުށެއްގެ ގޮތުގައި ބެލެވޭނީ ލީޓަރަކަށް 0.8 ގްރާމަށްވުރެ މަތިވުމުން ކަމަށެވެ.މި މައްސަލައިގައި ޑޭވިސްއަށް ކުރިމަތިވެދާނެ އަދަބަކީ 500 ޔޫރޯގެ ޖޫރިމަނާއަކާއި އެއް މަސް ދުވަހުގެ މުއްދަތަށް ޑްރައިވިންގ ލައިސަންސް ހިފެހެއްޓުމެވެ. ނަމަވެސް، ރިޕޯޓުގައި ބުނެފައިވާ ގޮތުން، އޭނާގެ ލައިސަންސް ވަގުތުން ބާޠިލްކޮށްފައެއް ނުވެއެވެ. އަދި އޭނާއާއެކު ކާރުގައި އިން އޭނާގެ ރައްޓެއްސަކު ވަނީ ކާރު ދުއްވައިގެން ގޮސްފައެވެ.މި ހާދިސާއާ ގުޅޭ ގޮތުން ބަޔަރން މިއުނިކް ކްލަބުން އަދި އެއްވެސް ބަޔާނެއް ނެރެފައެއް ނުވެއެވެ.