ޤާނޫނު އަސާސީއަށް ގެނެވުނު 5 އިސްލާޙުންވެސް ފައިދާ ކުރާނީ ރައްޔިތުންނަށް ކަމަށާއި، ސަރުކާރާ އިދިކޮޅު ފަރާތްތަކުން ހަމައެކަނި ފާހަގަ ކުރަނީ އޭގެ ތެރެއިން އެންމެ އިސްލާހެއްގެ ވާހަކަ ކަމަށް ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ.

އއ. މަތިވެރީ ރައްޔިތުންނާ ބައްދަލު ކުރައްވައި ރޭ ދެއްކެވި ވާހަކަފުޅުގައި ރައީސް ވިދާޅުވީ މި ސަރުކާރުން ކޮންމެ ކަމެއް ވެސް ކުރަނީ ރައްޔިތުންގެ ހައްގުތަކުގެ ދިފާއުގައި ކަމަށެވެ. އަދި އެމަނިކުފާނަށް އެންމެ މުހިއްމީ ދިވެހި ރައްޔިތުން ކަމަށާއި މާތް ﷲ ގަންދީ ހުވާ ކުރެއްވީ ދިވެހި ރައްޔިތުންނާއި ގައުމުގެ ހިމާޔަތުގައި ކަންކަން ކުރައްވަން ކަމަށް ވެސް ވިދާޅުވި އެވެ.

އެމަނިކުފާނު ވިދާޅުވީ އިސްލާހު ކުރި ފަސް މާއްދާގެ ތެރެއިން ވެސް މެންބަރުންގެ ގޮނޑި ގެއްލޭ މާއްދާގެ ވާހަކަ ދައްކާލެއް ގިނަ ކަމަށާއި ދެން އެ ހުރި މާއްދާ ތަކުގެ ވާހަކަ ނުވެސް ދައްކާ ކަމަށެވެ.

ގާނޫނު އަސާސީއަށް މި ސަަރުކާރުން ގެނައި ފަސް އިސްލާހުގެ މަގުސަދު، ރައްޔިތުންނަށް ސާފު ވާން ޖެހޭ ކަމަށް ވިދާޅުވެ، ރައީސް ވަނީ އެ އިސްލާހުތަކާ ގުޅޭ ގޮތުން ތަފުސީލީ ޕްރެޒެންޓޭޝަނެއް ހުށަހަޅުއްވައިދެއްވާފަ

ރައީސްގެ ޕްރެޒެންޓޭޝަންގައި ވިދާޅުވީ ގާނޫނު އަސާސީ އަށް އިސްލާހެއް ގެނައުމުގެ ކުރިން ރައްޔިތުންގެ ވޯޓުން ފާސް ކުރަން ޖެހޭ ހާލަތް ތަކަށް ރިއާޔަތް ކުރައްވަމުން، ފެންނަ ނުފެންނަ ވޯޓާ މެދު ގޮތް ނިންމުމަށް، މަދު މީސްކޮޅެއްގެ މުށުތެރޭގައި އޮތް ބާރު، ގާނޫނު އަސާސީ އަށް ގެނައި އިސްލާހާ އެކު ރައްޔިތުންގެ އަތްމައްޗަށް ދޫކޮށްލެވިފައިވާ ކަމަށެވެ.

މި ގެނައި ބަދަލަކީ ވެސް، ދިގު ރާސްތާގެ އަދި ކުރު ރާސްތާގެ ވެސް ތަރައްގީގެ ޕްލޭންތައް ހެދުމުގެ މަސްއޫލިއްޔަތު ރައީސުލްޖުމްހޫރިއްޔާއަށް މަތިކުރެވިފައި ނުވާތީ، އެކަމަށް ގެނައި އިސްލާހެއްކަން އެ މަނިކުފާނު ފާހަގަކުރެއްވި އެވެ.