ބެޑްމިންޓަން އެސޯސިއޭޝަން އޮފް މޯލްޑިވްސްއިން މިނިސްޓްރީ އޮފް ސްޕޯޓްސް އެންޑް ރެކްރިއޭޝަނާއި ދެކޮޅަށް ސިވިލް ކޯޓަށް ހުށަހެޅި މައްސަލަގައި އެ އެސޯސިއޭޝަނުން ހުށަހެޅި ގޮތަށް ވަގުތީ އަމުރު ނެރެދެވެން ނެތް ކަމަށް ކޯޓުން ކަނޑައަޅައިފިއެވެ. ސިވިލްކޯޓުގެ އަމުރުގައިވަނީ އެ އެސޯސިއޭޝަންގެ ހިންގާ ކޮމެޓީގެ މުއްދަތު ހަމަވެފައިވާތީ އެ ގޮތަށް ހުށަހެޅުމުގެ ހައިސިއްޔަތު އެ ކޮމެޓީއަށް ލިބިފައިނުވާކަމަށެވެ.

ބީ.އޭ.އެމް އިން ވަގުތީ އަމުރަކަށް އެދުނީ މި ދިޔަ އޯގަސްޓް މަހުގެ އެގާރަވަނަ ދުވަހު މިނިސްޓްރީން އެ އެސޯސިއޭޝަންގެ ހިންގުން ކުޅިވަރާބެހޭ ޤައުމީ މަޖިލީހަށް ހަވާލުކުރުމަށާއި، އިންތިޚާބާއިބެހޭ ވަގުތީ ކޮމެޓީއެއް އެކުލަވާލައި އިންތިޚާބު ކުރިޔަށް ގެންދިއުމަށް ނިންމާ ފޮނުވި ސިޓީއާއި ގުޅިގެންނެވެ.

ބީ.އޭ.އެމް ގެ ހިންގާ ކޮމެޓީގެ ދައުރު ހަމަވެ، އިންތިޚާބު ބާއްވަން މަސައްކަތް ކުރަމުން ދަނިކޮށް އެ އިންތިޚާބުގައި ވޯޓް ދޭ މެމްބަރުންގެ ސައްހަކަމާމެދު ސުވާލު އުފައްދާ ސްޕޯޓްސް ކޮމިޝަނަރުގެ އޮފީހުން ވަނީ އަސާސީ ޤަވާއިދު އިސްލާހުކޮށްފައި މެނުވީ އިންތިޚާބު ކުރިޔަށް ނުގެންދިއުމަށް އެ އެސޯސިއޭޝަނަށް އަންގާފައެވެ. އެހެން ނަމަވެސް އަސާސީ ޤަވާއިދު އިސްލާހު ކުރުމުގެ މަސައްކަތް ބީ.އޭ.އެމްއިން ކޮށްފައެއް ނުވެއެވެ.