ކުރީގެ ނައިބުރައީސް އަބްދުﷲ ޖިހާދު ފިނޭންސް މިނިސްޓަރަކަށް ހުންނެވި އިރު ފުށިދިއްގަރުފަޅުގެ އެއްބަސްވުމުގައި ސޮއި ކުރެއްވިއިރު ދައުލަތަށް ފައިދާ ނުވާ ގޮތަށް އަމަލު ކުރެއްވި ކަމަށް ބުނެ ޖިހާދުގެ މައްޗަށް ދައުލަތުން ދައުވާކުރާ މައްސަލަ އަލުން ހައިކޯޓަށް ހުށަހެޅުމުގެ ހުއްދަ އެކޯޓުން ދީފި އެވެ.

މި މައްސަލާގެ އިސްތިއުނާފް ދައުލަތުން ދެވަނަ ފަހަހރަށް މިމަހުގެ 3 ވަނަ ދުވަހު ވަނީ ހައިކޯޓަށް ހުށަހަޅާފަ އެވެ. އިސްތިއުނާފް މައްސަލަ ބަލައިނުގަތުމަށް ހައި ކޯޓުގެ ރަޖިސްޓްރާ އޭރު ވަނީ ނިންމާފަ އެވެ. އެހެންވެ ހައިކޯޓުގެ ފަނޑީޔާރުންގެ ބެންޖުންވެސް ވަނީ ރަޖިސްޓްރާގެ ނިންމެވުން ދަމަހައްޓާފަ އެވެ. އެމައްސަލަ އަލުން ވަނީ ހައިކޯޓަށް މިމަހުގެ 8 ވަނަ ދުވަހު ހުށަހަޅާފަ އެވެ. މައްސަލަ ބަލައިނުގަންނަން ނިންމީ މައްސަލަ ހުށަހެޅީ ދިން މުއްދަތަށް ވުރެ ދެ ދުވަސް ފަހުން ކަމަށް ވާތީ އެވެ. އޭރު މައްސަލަ ހުށަނޭޅުނީ ޖިހާދު އުޅުއްވާ އެޑްރެސް ސާފު ނުވާތީ އެވެ.

އެޑްރެސް ސާފުކޮށް އަލުން މައްސްލަ ހުށަހަޅަން 15 ދުވަހުގެ ފުރުސަތެއް ދީފައި އަނބުރާ ޕީޖީ އޮފީހަށް ފޮނުވާލި އެވެ. ޕީޖީ އޮފީހުން ބުނެފައި ވަނީ ހައި ކޯޓުން ދިން ތާރީހަށް ވުރެ ފަހުން ޕީޖީ އޮފީހަށް މައްސަލަ ހުށަހެޅުނީ އަމިއްލަ ބާރު ނުފޯރުވޭ ސަބަބެއް އޮވެގެން ކަމަށެވެ. އެހެންވެ އެދުވަހުގެ އަޑުއެހުމުގައި ފަނޑީޔާރުންގެ ބެންޖުންވަނީ ޖިހާދުގެ އެޑްރެސް ސާފުނުވުމަކީ އަމިއްލަ ބާރު ނުފޯރުވޭ ކަމެއް ގޮތުގައި ނިންމަވާފަ އެވެ.

ދައުލަތުން ވަނީ މިމަހުގެ 15 ވަނަ ދުވަހު ސުޕްރީމް ކޯޓަށް ހައި ކޯޓު ނިންމުމުގެ އިސްތިއުނާފު ހުށަހަޅާފަ އެވެ.

ޖިހާދުގެ މައްޗަށް ދައުލަތުން ދައުވާކުރަނީ 2013 ވަނަ އަހަރު ފިނޭންސް މިނިސްޓަރަކަށް ޖިހާދު ހުންނެވި އިރު ފުށިދިއްގަރުފަޅުގެ އެއްބަސްވުމުގައި ސޮއި ކުރެއްވިއިރު ދައުލަތަށް ފައިދާ ނުވާ ގޮތަށް އަމަލު ކުރެއްވި ކަމަށް ބުނެ އެވެ.

ފުށިދިއްގަރުފަޅު މައްސަލާގައި 2021 ވަނަ އަހަރު ކްރިމިނަލް ކޯޓުން ޖިހާދުގެ މައްޗަށް ކޮށްފައިވަނީ ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލު ކުރުމުގެ ދައުވާ އެވެ. އޭރު ޖިހާދުގެ މައްޗަށް ކުރި ދައުވާއަށް ޖިހާދު ވަނީ އިންކާރު ކުރައްވާފަ އެވެ.

ކްރިމިނަލް ކޯޓުގައި 2021 ވަނަ އަހަރު ކުރިއަށް ދިޔަ މައްސަލާގައި ދައުލަތުން ވަނީ ޖިހާދުއާއި ދެކޮޅަށް ހެކިވެސް ހުށަހޅުއްވާފަ އެވެ. ހެކީގެ ގޮތުގައި ދައުލަތުން ހުށަހަޅާފައިވަނީ ކުރީގެ ނައިބު ރައީސް އަހުމަދު އަދީބާއި އިތުރު ބައެއް މީހުންނާއި އެންޓި ކޮރަޕްޝަން ކޮމިޝަން (އޭސީސީ) އާއި އެސެޓް ރިކަވަރީ ކޮމިޝަނަށް ޖިހާދު ދެއްވާފައިވާ ބަޔާނާއި ވަޒީރުންގެ މަޖިލީހުގެ ބައެއް ލިޔުންތަކެވެ.

އެހެންނަމަވެސް އެ މައްސަލަ ކުރިއަށް ނުގެންދެވޭނެ ކަމަށް ކްރިމިނަލް ކޯޓުން އޭރު ނިންމުމުން ދައުލަތުން އެމައްސަލަ އިސްތިއުނާފް ކުރަން ހައިކޯޓަށް ހުށަހެޅިއެވެ. އެ މައްސަލަ ހައި ކޯޓުގައި ފުރަތަމަ އޮއްވާ އެ ކޯޓުން އެ މައްސަލަ ބޭރުކޮށްލީ ޖިހާދު ދިރިއުޅުއްވާ އެޑްރެސް ސާފުނުވާތީ ކަމަށް ބުނެ އެވެ.