ހައިކޯޓުން އެންގީ ޖިހާދުގެ މައްސަލަ އަލުން ބަލަން
.webp&w=3840&q=75)

13 ޖެނުއަރީ 2025 - 11:35
ކުރީގެ ނައިބު ރައީސް އަބްދުﷲ ޖިހާދުގެ މައްޗަށް އުފުލާފައިވާ ދައުވާ ކްރިމިނަލް ކޯޓުން ބޭރުކޮށްލީ ގޯސްކޮށް ކަމަށް ކަނޑައަޅައި، އެ މައްސަލަ އަލުން ބަލަން ހައި ކޯޓުން މިއަދު ކްރިމިނަލް ކޯޓަށް އަންގައިފި އެވެ.
މި މައްސަލާގައި ޖިހާދުގެ މައްޗަށް ދައުލަތުން ދައުވާކޮށްފައި ވަނީ ކުރީގެ ނައިބުރައީސް އަބްދުﷲ ޖިހާދު ފިނޭންސް މިނިސްޓަރަކަށް ހުންނެވި އިރު ފުށިދިއްގަރުފަޅުގެ އެއްބަސްވުމުގައި ސޮއި ކުރެއްވިއިރު ދައުލަތަށް ފައިދާ ނުވާ ގޮތަށް އަމަލު ކުރެއްވި ކަމަށް ބުނެއެވެ.
ފުށިދިއްގަރުފަޅު މައްސަލާގައި 2021 ވަނަ އަހަރު ކްރިމިނަލް ކޯޓުން ޖިހާދުގެ މައްޗަށް ކޮށްފައިވަނީ ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލު ކުރުމުގެ ދައުވާ އެވެ. އޭރު ޖިހާދުގެ މައްޗަށް ކުރި ދައުވާއަށް ޖިހާދު ވަނީ އިންކާރު ކުރައްވާފަ އެވެ.
އެ ދައުވާ ކުރިއަށް ނުގެންދެވޭނެ ކަމަށް ކްރިމިނަލް ކޯޓުން ނިންމުމުން އެ މައްސަލަ ދައުލަތުން ވަނީ ހައި ކޯޓުގައި އިސްތިއުނާފްކޮށްފަ އެވެ.
ހައި ކޯޓުން މިއަދު ކުރި ހުކުމުގައިވަނީ ދަށު ކޯޓުން މައްސަލަ ބޭރުކޮށްލާފައިވަނީ ގާނޫނީ ކޮން އަސާސެއްގެ މައްޗަށް ބިނާކޮށް ކަމެއް ސާފުނުވާ ކަމަށެވެ. އެހެންވެ، އެ މައްސަލައިގެ ޝަރީއަތް ކްރިމިނަލް ކޯޓުން ކުރިއަށް ގެންދަން ޖެހޭނެ ކަމަށް އެ މައްސަލަ ބެއްލެވި ތިން ފަނޑިޔާރުންގެ އިއްތިފާގުން ކުރެއްވި ހުކުމުގައި އަންގާފައިވެ އެވެ.
މި މައްސަލާގައި ހައި ކޯޓުން ބާއްވާފައިވަނީ އެންމެ އަޑުއެހުމެކެވެ. އެ އަޑުއެހުމަށް ޖިހާދު ވަޑައިގެންނެވީ ގާނޫނީ ވަކީލަކާ ނުލަ އެވެ. ޝަރީއަތުގެ މަޖިލީހުގައި ޖިހާދު ވަނީ ވަކީލަކު ބޭނުންވާ ކަމުގެ ޝަކުވާ ތަކުރާރުކޮށް ކުރަށްވާފައެވެ.
މި މައްސަލައަކީ ގާނޫނު އޮތްގޮތުން 14 ދުވަސް ތެރޭ ނިންމަން ޖެހޭ ބާވަތުގެ މައްސަލައަކަށްވާތީ އެ ފުރުސަތު ދެވެން ނެތް ކަމަށް ފަނޑިޔާރުން އެންގެވި އެވެ.
އެހެންނަމވެސް މިއަދު ހުކުމް އިއްވަން ބޭއްވި އަޑުއެހުމަށް ޖިހާދު ވަޑައިގެންނެވީ ވަކީލަކާ އެކު އެވެ.
އިތުރު ލިޔުންތައް

ކާރު އެކްސިޑެންޓްގައި މީހަކު ނިޔާވުން: ވިސާމްގެ ބަންދަށް ލުޔެއް ނުދިން
5 މަސް ކުރިން
ދިރިއުޅޭ އެޑްރެސް ސާފުނުވާތީ ބޭރުކޮށްލި މައްސަލަ އަލުން ހައިކޯޓަށް
5 މަސް ކުރިން
ބައްސާމް ހުށަހެޅި އިސްތިއުނާފްގެ މައްސަލަ ހައިކޯޓަށް ބަލައެއް ނުގަތް
5 މަސް ކުރިން