މާލޭގައި ހުންނަ ޔޫއޭއީ އެމްބަސީގެ ކުލީގެ މައްސަލައަކާ ގުޅިގެން ސިވިލް ކޯޓުން ކުރި ހުކުމްގެ މައްސަލަ ހައިކޯޓުގައި އިސްތިއުނާފުކޮށްފި އެވެ.

މި މައްސަލަ އަކީ އެމްބަސީހިންގާ އިމާރާތުގެ ކުލީގެ ގޮތުގައި ނުދައްކާ 1.4 މިލިއަން ރުޕިޔާ ހޯދުމަށް ގ.ނިއުޝާ އާމިނަތު އަހުމަދު ދީދީ ހުށަހެޅި މައްސަލައެކެވެ. އެއީ 2020 ވަނަ އަހަރުގެ މެއި މަހުން ފެށިގެން 2022 ވަނަ އަހަރުގެ އޮކްޓޯބަރު މަހާ ދެމެދު ތިން ބުރީގެ އިމާރާތުގެ ކުލި ދައްކާފައި ނުވާ ކަމަށް ބުނެއެވެ.

Ad by Hajj Corporation

ސިވިލް ކޯޓުން މީގެ ކުރިން އެ މައްސަލަ ކުރި ހުކުމްގައި ބުނެފައިވަނީ ޔޫއޭއީ އެމްބަސީގެ ޑިޕްލޮމެޓިކް އިމިއުނިޓީގެ ސަބަބުން އެމައްސަލަ ނުބެލޭނެކަމަށެވެ. އެ ހުކުމުގައި ބުނެފައި ވަނީ އެމްބަސީގެ ޑިޕްލޮމެޓިކް ސްޓޭޓަސްގެ ސަބަބުން އެ މައްސަލަ ބެލެހެއްޓުމަށް ކޯޓުން ހުރަސް އެޅިފައިވާ ކަމަށެވެ.

ނަމަވެސް އެ މައްސަލަ މިހާރު ވަނީ ހައި ކޯޓަށް ހުށަހަޅައިފައެވެ. މި މައްސަލަ އަކީ އެ ތަނުގެ ކުލީގެ ގޮތުގައި ނުދައްކާ ހުރި 92،000 ޑޮލަރު (1.4 މިލިއަން ރުޕިޔާ) އަށް ވުރެ ގިނަ ފައިސާ ހޯދުމުގެ މައްސަލަ އެވެ.