ކީރިތި ގުރުއާން ހިތުދަސްކުރާ ހާފިޒުންގެ ދަސްވެނިވުމުގެ ހަފްލާ ކޮންމެ އަހަރެއްގައި ވެސް ރަމަޟާން މަހުގެ 27 ވިލޭރޭ ބާއްވަން ނިންމައިފިއެވެ.

މިކަމާ ގުޅޭގޮތުން އިސްލާމިކް މިނިސްޓަރ ޑރ މުޙައްމަދު ޝަހީމް ޢަލީ ސަޢީދު ވިދާޅުވީ މި އަންނަ ރަމަޟާން މަހުގެ 27 ވިލޭރޭ ގުރުއާން ހިތުދަސްކުރާ ފަރާތްތައް ދަސްވެނިވުމުގެ ފުރަތަމަ ހަފްލާ އޮންނާނެ ކަމަށެވެ.

މިއަހަރުގެ މިހާތަނަށް ގިނަ ބަޔަކު ގުރުއާން ހިތުދަސްކޮށް، ހާފިޒުކަމުގެ އިމްތިހާން ހެދުމަށް އެދިފައިވާކަމަށް މިނިސްޓަރ ޝަހީމް ވިދާޅުވިއެވެ. އެގޮތުން މިހާރުވެސް ތިން މީހަކު ގުރުއާން ހިތުދަސްކުރުމަށްފަހު އިމްތިހާން ހަދަމުންދާ ކަމަށާއި ދެ މީހަކު އިމްތިހާނު ހެދުމަށް އެދިފައިވާ ކަމަށް ވިދާޅުވިއެވެ.

މީގެ އިތުރުން ފަސް އަހަރުގެ ކުއްޖަކުވެސް ގުރުއާން ހިތުދަސްކުރުމަށްފަހު މުރާޖައާ ކުރުމަށް އެދިފައިވާ ކަމަށް ވެސް ޝަހީމް ވަނީ ވިދާޅުވެފައެވެ.

މީގެ އިތުރުން މިނިސްޓަރ ވިދާޅުވީ، ގުރުއާން ހިތުދަސްކުރާ ފަރާތްތައް ދަސްވެނިވުމަށް ކޮންމެ އަހަރަކު ހާއްސަ ހަފްލާއެއް ބާއްވަން ނިންމާފައިވާކަމަށެވެ.

މި ހަފްލާ ބޭއްވުމަށް ހަމަޖެހިފައިވަނީ ކޮންމެ އަހަރެެއްގެ ރަމަޟާން މަހުގެ 27 ވިލޭރޭ ކަމަށާއި، ދަސްވެނިންނަށް ހާއްސަ ގައުނެއް ވެސް ތައްޔާރުކުރެވޭނެ ކަމަށް ވެސް މިނިސްޓަރ ވިދާޅުވިއެވެ.