ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ހުޅުމާލެ، ގުޅީފަޅު އަދި އުތުރު ތިލަފަޅުން ގޯތި ދޫކޮށްފައި ވަނީ އިންސާފުން ނޫން ކަމަށް މަހިބަދޫ ދާއިރާގެ މެމްބަރު އަހްމަދު ތޯރިގު ވިދާޅުވެއްޖެއެވެ.

މިއަދު އޮތް ރައްޔިތުންގެ މަޖިލީހުގެ ޖަލްސާގައި ވާހަކަފުޅު ދައްކަވަމުން ޕީއެންސީއަށް ނިސްބަތްވާ ތޯރިގު ވިދާޅުވީ، ކުރީ ސަރުކާރުން އިންތިހާބާއި ދިމާކޮށް ކަނޑުންނާއި ފަޅުން ބިންދޫކުރުމަށްފަހު، އެތަންތަން ހަވާލުކުރުން ލަސްވެގެން އެވާހަކަދައްކަން ލަދުގަންނަންޖެހޭނެ ކަމަށެވެ.

Ad by Hajj Corporation

"ނިކަމެތިވެ، ބޯހިޔާވަހިކަމެއް ނެތް ރައްޔިތުންގެ ބަޔަކަށް ދޫކުރި ގޯތިތަކުގައި މިހާރު ހުރީ ޖިފުޑިގަނޑެއްހެން ކެފޭތައް ހަދައިފަ," ތޯރިގު ވިދާޅުވިއެވެ. އަދި ހުޅުމާލޭގެ މުޅި މާސްޓަ ޕްލޭން ބަދަލުކޮށް، އަގު ބޮޑު އެތައް ބިމެއް އެގޮތަށް ހިލޭ ދޫކޮށްލުމުން އެތައް ގެއްލުމެއް ލިބިފައިވާ ކަމަށްވެސް އޭނާ ފާހަގަކުރެއްވިއެވެ.

"ހުޅުމާލޭގެ މާސްޓަ ޕްލޭން ހަދަމުން ދިޔަ ނުވަތަ އޭގެ ތެރޭގައި ތިބި ރަނގަޅަށް ވިސްނުން ހުރި މީހުން ހިނގައްޖެ އިސްތިއުފާ ދީފައި. ދެން މި ބުނަނީ ކޮން އިރަކުންހޭ ގުޅިފަޅުން ގޯތި ދެނީ؟ އަޅެ އެ ތަން ހިއްކާ ނިމުނީމަ ނޫންތަ ގޯތި ދެވޭނީ." ތޯރިގު އިތުރަށް ވިދާޅުވިއެވެ.

މި ބަހުސް ކުރިއަށްދަނީ ރާއްޖޭގެ ބޯހިޔާވަހިކަމުގެ މައްސަލަ އިތުރަށް ބޮޑުވަމުންދާ ދަނޑިވަޅެއްގައެވެ. ކުރީގެ ސަރުކާރުގެ ގޯތި ދޫކުރުމުގެ ސިޔާސަތުތަކާމެދު ސުވާލު އުފެދިފައިވާއިރު، މިހާރުގެ ސަރުކާރުން މި މައްސަލަ ހައްލުކުރުމަށް އަޅާނެ ފިޔަވަޅުތަކަކީ ކޮބައިތޯ ބެލުމަށް ގިނަ ފަރާތްތަކުން ދަނީ އިންތިޒާރު ކުރަމުންދެއެވެ.