މިއަދު ވެސް ރާއްޖޭގެ ބޮޑުބަޔަކަށް މޫސުން ގޯސްވާނެ ކަމަށް މޫސުމާ ބެހޭ ގައުމީ އިދާރާ (މެޓް އޮފީހުން) ބުނެފިއެވެ.

މެޓްއިން ބުނނި ގޮތުގައި،މިއަދު ރާއްޖޭގެ އުތުރާއި މެދު ރާއްޖެތެރޭގެ އެކި ހިސާބަށް ވިއްސާރަކޮށް، ބައެއް ރަށްތަކަށް ބޯކޮށް ވާރޭ ވެހި ގުގުރުން އެކަށީގެންވެއެވެ. އަދި މި ހިސާބުގައި ވިލާގަނޑު ގައިގަޑިއަކު 35 މޭލަށް ވައިގަދަވުން ވެސް އެކަށީގެންވާ ކަމުގައި މެޓް އޮފީހުން ބުންޏެވެ.

އެގޮތުން ދެކުނުގެ މަދު ރަށްތަކަށް ކެރީގެ އަސަރުކުރި ނަމަވެސް، އެހިސާބުގައި އާންމު ގޮތެއްގައި މޫސުން ރަނގަޅުވާނެ ކަމަށްވަނީ މެޓްއިން ވަނީ ލަފާކޮށްފައެވެ. މި ސަރަހަށްދަށް، ހުޅަނގާއި ހުޅަނގު އުތުރުން ވައި ޖެހޭނެކަމަށް ލަފާކޮށްފައިވާއިރު އެހެން ހިސާބުތަކަށް އިރު އުތުރާއި އިތުން، ގަޑިއަކު 8 މޭލާއި 18 މޭލާއި ދެމެދުގެ ބާރުމިނުގައި ވައިޖެހޭނެކަމަށް ވެސް މެޓްއިން ވަނީ ލަފާކޮށްފައެވެ.

އެހެންކަމުން ދިޔަވަރު ބޮޑުވާ ވަގުތުތަކުގައި އުދައެރުމަކީ އެކަށީގެންވާ ކަމަކަށްވެފައި މޫސުމަށް ސަމާލުވުމަށް މެޓް އިން ވަނީ އިލްތިމާސްކޮށްފައެވެ.

އަދި ވަޔާއެކު، ރާއްޖޭގެ ކަނޑުތައް ވެސް އާދައިގެ ވަރަކަށް ގަދަވާނެ ކަމަށް ލަފާކުރެވޭއިރު، ރާޅުގަނޑުގެ އުސްމިން ހަ ފޫޓާއި ހަތަރު ފޫޓުގެ ދެމެދުގައި ހުންނާނެކަމަށް މެޓްއިން ލަފާކުރެއެވެ. އޭގެ ސަބަބުން ވިލާގަނޑުގައި ކަނޑުތައް އިތުރަށް ގަދަވާނެ ކަމަށް މެޓް އިން ވަނީ ލަފާކޮށްފައެވެ.

ރާއްޖެ އަށް މިހާރު ކުރަމުންދާ ބޯ ވިއްސާރައިގެ ސަބަބުން، އިއްޔެގައި ވަނީ ފެން ބޮޑުވި ކަމުގެ ރިޕޯޓް ގިނަ ރަށަކުން ލިބިފައެވެ. މި ރަށްރަަށުގައި ފެން ހިންދުމުގެ މަސައްކަތުގައި ސިފައިން ވަނީ ހަރަކާތްތެރިވެފައެވެ. އަދި ބޯކޮށް ވާރޭ ވެހި ބައެއް ރަށްތަކަށް ވަނީ އެކި ވަރުގެ ގެއްލުން ލިބިފައެވެ.

އެހެން ނަމަވެސް، ކުރިއަށް އޮތް 48 ގަޑިއިރު މޫސުމާއި ކަނޑުގެ ހާލަތު މަޑުމަޑުން ރަނގަޅުވާނެ ކަމަށް މެޓް އިން ވަނީ ލަފާކޮށްފައެވެ.