އެމެރިކާގެ އިންތިޚާބީ ރައީސް، ޑޮނަލްޑް ޓްރަމްޕުގެ ފަރާތުން މެދު އިރުމައްޗަށް ކަނޑައަޅާ ޚާއްސަ މަންދޫބުގެ ނައިބަށް، މޯގަން އޯޓަގަސް ހަމަޖައްސައިފިއެވެ.

އެމެރިކާގެ ޕްރޯ އިސްރާއީލް ލޮބީގައި ހިމެނޭ މޯގަން، އެ މަގާމަށް ހަމަޖެއްސީ މިއަދުއެވެ. އެގޮތުން އެ މަގާމަށް އައްޔަނުކުރެވުމުން މޯގަން ވަނީ ، އެކަމަކީ އޭނާއަށް ލިބޭ ވަރަށް ބޮޑު ޝަރަފެއްގެ ގޮތުގައި ސިފަކުރައްވާފައެވެ. އަދި އެ މަގާމުގައި ހުރެ، ފުރިހަމަ ޑިޕްލޮމެޓިކް ދައުރެއް އަދާކުރެވޭނެ ކަމުގެ ޔަގީންކަން އެބައޮތް ކަމުގައި ވެސް މޯގަން ވިދާޅުވިއެވެ.

މޯގަން އެ މަގާމުގައި މަސައްކަތްކުރައްވަން ޖެހިވަޑައިގަންނަވާނީ އެމެރިކާގެ ބިލިއަނަރު އަދި ރިއަލް އެސްޓޭޓްގެ ވިޔަފާރީގައި ހަރަކާތްތެރިވާ ސްޓެވެން ވިޓްކޮފްގެ ދަށުންނެވެ. އޭނާ އެ މަގާމަށް އައްޔަނުކޮށްފައިވަނީ މިދިޔަ ނޮވެމްބަރު މަހުގެ ތެރޭގައެވެ.

ޓްރަމްޕުގެ ފުރަތަމަ ވެރިކަމުގައި ވެސް ސްޓޭޓް ޑިޕާޓްމެންޓުގެ ތަރުޖަމާނުގެ މަގާމް ފުރުއްވި މޯގަން އަކީ އިސްރާއީލް، ބަހްރެއިން އަދި އެކުވެރި އަރަބި އިމާރަތާއި އެމެރިކާ އާ އޮންނަ ގުޅުން އާންމުކުރުމުގެ ކަންކަން ބަލަހައްޓަމުން ދިޔަ "އަބްރަމް އެކޯޑްސް ޓީމު"ގައި ވެސް ހިމެނުނު ބޭފުޅެކެވެ.