އުމްރާއަށް މީހުން ގެންދިއުމާ ބެހޭގޮތުން އެކުލަވާލާފައިވާ އުސޫލާ ހިލާފަށް އަމަލުކޮށްފައިވާ ބައެއް އެހެން ކުންފުނިތަކަށް އަންނަ ހަފްތާގައި ފިޔަވަޅު އަޅާނެކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ވަޒީރު ވިދާޅުވީ ދިވެހިރާއްޖެއިން މީހުން ޢުމްރާއަށް ގެންދިއުމާ ބެހޭގޮތުން 9 އޮކްޓޫބަރު 2024 ގައި ގެޒެޓްކޮށްފައިވާ އުޞޫލާ އެއްގޮތައް ޢަމަލުކޮށްފައިނުވާ ބައެއް އެހެން ކުންފުނިތައް ވެސް ފާހަގަވެފައިވާތީވެ، އަމަލު ނުކޮށް ދޫކޮށްލި ކަމުގެ ކުޑަބޮޑު މިނަށް ބަލައި އަންނަ ހަފްތާގައި އުޞޫލުގައި ބުނާގޮތުގެ މަތިން ފިޔަވަޅު އަޅާނެކަމަށެވެ.

ވަޒީރު މިފަދައިން ވިދާޅުވި އިރު އަލްހިޖްރަ ޓްރެވަލްސް އެންޑް ޓުއާސް ގްރޫޕުގެ ހަވާލުގައި އުމްރާއަށް ދިޔަ މީހުން ހާލުގައިޖެއްސި މައްސަލައާ ގުޅިގެން އެ ގުރޫޕު ޖޫރިމަނާކޮށް ހަރުކަށި ފިޔަވަޅުތަކެއް ވަނީ އަޅާފައެވެ. އެ ގްރޫޕުގެ ހަވާލުގައި އުމްރާއަށް ދިޔަ މީހުން ހޮނިހިރު ދުވަހު މާލެ އަންނާނެކަމަށް ސަރުކާރުން ވަނީ ބުނެފައެވެ.

އުމްރާވެރިން ޖިއްދާ އެއާޕޯޓުން ފުރާނީ ހުކުރު ދުވަހުގެ އިރު އޮއްސި 7:30 ގައި ކަމަށާއި ދޯހާގައި 3 ގަޑިއިރުގެ ޓްރާންސިޓަކަށްފަހު ހޮނިހިރުދުވަހުގެ ހެނދުނު 8:10 ގައި މާލެ އާދެވޭނެކަމަށް ޝަކީލް ވިދާޅުވިއެވެ.

މީގެ އިތުރުން މަޝްއަރު ޓުއަރސްގެ ޗެކެއް ބައުންސްވި މައްސަލަ ޕްރޮސެކިއުޓަރ ޖެނެރަލް (ޕީޖީ)ގެ އޮފީހަށް ފުލުހުން ވަނީ ހުށަހަޅައިފައެވެ.

މީގެ ކުރިން 2023 ވަނަ އަހަރުވެސް އެ ގްރޫޕުން އުމްރާއަށް ގެންދިޔަ އުމްރާވެރިންގެ ޓިކެޓް ފައިސާގެ ޗެކް ބައުންސްވުމުން، ގުރޫޕުގެ ހުއްދަ މިނިސްްޓްރީން ބާތިލް ކުރަން ޖެހުނެވެ. މިފަހަރު މަޝްއަރު ގްރޫޕުގެ މައްސަލަ އިސްލާމިކް މިނިސްޓްރީން ފުލުހުންނަށް ހުށަހެޅީ އުސޫލުން ބޭރުން މީހުން އަތުން ފައިސާ ނަގައި އެ ފައިސާއަށް އިހުމާލުވި މައްސަލަ ބަލަން އެ ގްރޫޕުގެ މައްސަލަ ފުލުހަށް ހުށަހެޅުމުންނެވެ.

މިފަހަރު މީހުން އުމްރާއަށް ގެންދިޔައީ 33 ކުންފުނިންނެވެ.