މި އަހަރުގެ ފުރަތަމަ ކުއާޓަރުގެ ކުރިން އީފާސް މެދުވެރިކޮށް ސިޔާސީ ޕާޓީތަކަށް މީހުން ވެއްދޭ ގޮތް ހެދުމަށް މަސައްކަތް ކުރަމުންދާ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.

މިކަމާ ގުޅިގެން އީސީގެ މެންބަރު ހަސަން ޒަކަރިއްޔާ ބައެއް މީޑިއާތަކަށް ވިދާޅުވީ އީފާސް މެދުވެރިކޮށް ޕާޓީތަކަށް މީހުން ވައްދާ ގޮތަށް އުސޫލު ބަދަލު ކުރުމަކީ ހައްލަކަށް ވާނެ ކަމަށާއި އޭނަ ވިދާޅުވީ މެންބަރޝިޕް ފޯމުތަކަށް އެތައް ފީޗާއެއް އިތުރުކުރި ނަމަވެސް ވަގު ފޯމް ހުށަހެޅުން ނުހުއްޓޭ ކަމަށެވެ.

އެހެންވެ ކުރިއަށް އޮތް ދެ މަސް ދުވަހުގެ ތެރޭގައި އީފާސް މެދުވެރިކޮށް ޕާޓީއަށް ވައްދާ ގޮތަށް އުސޫލުތަކާއި ގަވާއިދުތަކަށް ގެންނަން ޖެހޭ ބަދަލުތައް ގެނައުމުގެ މަސައްކަތް ކުރަމުން އަންނަ ކަމަށް ވިދާޅުވި އެވެ.

އީސީން ބުނެފައިވަނީ ވަގު ފޯމް ހުށަހަޅައިގެން 300 އެއްހާ ޝަކުވާ މި ފަހުން ލިބިފައިވާ ކަމަށެވެ. ބައެއް ޕާޓީތަކުން ވަނީ މިފަދަ މައްސަލަތައް ފުލުހުންނަށް ވެސް ހުށަހަޅައިފަ އެވެ.

އީސީން މި ބަދަލު ގެންނަން ނިންމީ މީސްމީހުންގެ ޒާތީ މައުލޫމާތާއި، ވަގަށް ފިންގަޕްރިންޓް ފޯޖްކޮށް ޕާޓީތަކަށް މީހުން ވައްދާ މައްސަލަ ބޮޑުވެފައި ވަނިކޮށެވެ.