ސިއްޙަތަށް ނުރައްކާވާ މިންވަރަށް މާލެ ސަރަޙައްދުގެ ވައި ނުސާފުވެ ތުއްތު ކުދިން ބޭރަށް ނުނެރުމަށް އެދިއްޖެ

.jpg&w=3840&q=75)
20 ޖެނުއަރީ 2025 - 05:12
ސިއްޙަތަށް ނުރައްކާވާ މިންވަރަށް މާލެ ސަރަޙައްދުގެ ވައި ނުސާފުވެ ތުއްތު ކުދިން ބޭރަށް ނުނެރުމަށް އެދިއްޖެއެވެ.
ކޮންމެ އަހަރެއްގެވެސް އިރުވައި މޫސުން ފެށިގެން އަންނައިރު ރާއްޖޭގެ އިރު އުތުރުން ވައި ޖެހެމުންދާތީ، ކޮންމެ އަހަރެއްގެވެސް މިމުއްދަތުގެ ތެރޭގައި ރާއްޖޭގެ ވައި ނުސާފުވުމުގެ މައްސަލަ ކުރިމަތިވެއެވެ.
މައިގަނޑުގޮތެއްގައި އިންޑިއާ ސަބްކޮންޓިނެންޓުން އަންނަ ހިރަފުސްދުން ރާއްޖެމައްޗަށް އަންނަކަމަށް މޫސުމާއި ބެހޭ ޤައުމީ އިދާރާއިން ވިދާޅުއެވެ އަދި ކޮންމެ އަހަރެއްގެވެސް ޖެނުއަރީ ފެބްރުއަރީ މަހު ރާއްޖޭގެ ވައި ނުސާފުވާކަމާށް ރިކޯޑުކުރެވޭކަން އެއިދާރާއިން ފާހަގަކުރައްވައެވެ. އަދި އާއްމުގޮތެއްގައި ވައި ސާފުވަނީ މަރިޗު މަހުގެ ތެރޭގައިކަމަށް މެޓު އޮފީހުން ވިދާޅުވެއެވެ
ރާއްޖެ ސަރަޙައްދުގެ ވައި އާދިއްތަ ދުވަހު ނުސާފުވެފައިވާކަން ފާހަގަވެފައިވާއިރު ވައިޖެހޭ ގޮތަށް ބަލާއިރު ކުރިއަށް އޮތް 24 ގަޑިއިރުގެ ތެރޭވެސް ވައިގެ ކޮލިޓީ ދަށްވާނެކަމަށް މެޓުން ލަފާކުރައްވައެވެ
ޤައުމީ ޔުނިވަރސިޓީގެ ސެންޓަރ ފޯ މެރިޓައިމްގެ އެއަރ ކޮލިޓި މޮނީޓަރ ކުރުމަށް ވިލިނގިލީގައި ޤާއިމުކޮށްފައިވާ ޓްރެކަރއިން ދައްކާގޮތުގައި މެންދުނު 1300ގައި މާލެ ސަރަޙައްދުގެ ވައިގެ ކޮލިޓީ ހުރީ 137 ގައެވެ. މިއީ ނާޒުކު ފަރާތްތަކުގެ ސިއްޙަތަށް ނުރައްކާވާނެ މިންވަރެއްކަމަށް ކަމާބެހޭ ފަރާތްތަކުން ވިދާޅުއެވެ. އިރުއޮއްސުމާއި ހަމައަށްވެސް މިސަރަޙައްދުގެ ވައި ނުސާފު މިންވަރެއްގައި ހުންނާނެކަމަށް މިޓްރެކަރއިން އަންދާޒާކުރޭ.ރާއްޖޭގެ ވައިގެ ކޮލިޓީ މިދުވަސްކޮޅު ދަށްވެފައިވަނީ ސިއްޙަތަށް ނުރައްކާ އޮތް މިންވަރަކަށްކަމުން ހެލްތު ޕްރޮޓެކްޝަން އޭޖެންސީންވަނީ ސިއްޙަތަށް ސަމާލުވުމަށް އިލްތިމާސްކުރައްވާފައެވެ.
އެޗްޕީއޭއިންވަނީ، ފުއްޕާމޭގެ ބަލިތަކާއި ހިތުގެ ބަލި އަދި އެލަރޖީ މައްސަލަ ހުންނަ ފަރާތްތަކުން ގެއިން ބޭރުގައި ގިނަ ވަގުތު ހޭދަނުކުރުމަށް އެދިފައެވެ. ހަމައެއާއެކު ކުޑަކުދިންނާއި ދޮށީ އުމުރުގެ މީހުންނާއި މާބަނޑު މީހުންވެސް ބޭރުގައި ހޭދަކުރާވަގުތު މަދުކުރުމަށް ސަމާލުވުމަށް އެޗްޕީއޭއިންވަނީ ވިދާޅުވެފައެވެ
ބޭރަށް ނިކުންނަން ޖެހޭ ހާލަތްތަކުގައި ރައްކާތެރިކަމަށްޓަކައި މާސްކު އެޅުމަށާއި ތުއްތު ކުދިން ބޭރަށް ނުނެރުމަށްވެސް އެޗްޕީއޭއިން އިލްތިމާސްކުރައްވާފައެވެ އަދި މިދުވަސްވަރު މާލެ ސަރަޙައްދުގެ ވައި ނުސާފުވެފައިވާތީ ގެދޮރުގެ ދޮރުތައް ލައްޕާފައި ބެހެއްޓުމަށް އިސްކަންދިނުމަށާއި ބޭރުގައި ކުޅިވަރު ކުޅުމާއި ކަސްރަތުކުރުން ފަދަ ކަންކަން މަޑުޖައްސާލުމަށްވެސް އެޗްޕީއޭއިންވަނީ އަންގާފައެވެ.
ވައި މިދުސްވަރު ނުސާފުކަމަށް ދައްކާއިރު ބައެއް ދުވަސްތަކުގައި ހެނދުނު ގަޑީގައި ވައިގެ ކޮލިޓީ ދަށްވެފައި މެންދުރުފަހު ރަނގަޅުވެއެވެ. އަދި ބައެއް ދުވަސްތަކުގައި މެންދުރަށް ވައިގެ ކޮލިޓީ ދަށްވާކަމަށްވެސް މެރިޓައިމްގެ ޓްރެކަރއިން ދައްކައެވެ. އެހެންކަމުން މިދުވަސްވަރު ބޭރު ތެރޭގައި އުޅުމުގައި ސިއްޙަތަށް ސަމާލުވުމަކީ މުހިއްމުކަމެކެވެ.
މޫސުމާ ބެހޭ ޤައުމީ މަރުކަޒުން މަޢުލޫމާތު ދެއްވާފައިވާ ގޮތުގައި، ކޮންމެ އަހަރެއްގެވެސް އިރުވައި މޫސުން ފެށިގެން އަންނައިރު ރާއްޖޭގެ އިރު އުތުރުން ވައި ޖެހެމުންދާތީ، މިމުއްދަތުގެ ތެރޭގައި ރާއްޖޭގެ ވައި ނުސާފުވުމުގެ މައްސަލަ ކުރިމަތިވެއެވެ. މައިގަނޑު ގޮތެއްގައި އިންޑިއާ ސަބްކޮންޓިނެންޓުން އަންނަ ހިރަފުސްދުން ރާއްޖެމައްޗަށް އަންނަ ކަމަށް އެ އިދާރާއިން ވިދާޅުވެފައިވެއެވެ.
މިހާލަތުގައި ރައްޔިތުންގެ ސިއްޙަތާއި ރައްކާތެރިކަމަށް ސަމާލުވެ، އެޗްޕީއޭ އިން ދެއްވާފައިވާ އިރުޝާދުތަކަށް ޢަމަލުކުރުމަކީ މުހިންމު ކަމެކެވެ.